ПР агенцијата Eye Media категорично ги демантира наводите објавени во медиумите дека има соработка со Социјалдемократскиот сојуз на Македонија.
Во соопштението, компанијата наведува дека нема никаков договор, ангажман ниту било каква форма на соработка со СДСМ или нивните советници.
„Не постои никаков ангажман на агенцијата во креирање соопштенија, прес-конференции или било каква комуникациска поддршка за СДСМ“, се наведува во реакцијата.
Од Eye Media додаваат дека тврдењата за наводно „штанцање лажни соопштенија“, „центар за лаги“ или „надворешна ПР машинерија“ се целосно невистинити и немаат никаква основа во факти.
Во демантот се потенцира и дека компанијата нема никаква поврзаност со Зоран Башановиќ.
„Тој не е дел од нашиот тим ниту сме имале било каква соработка со него“, се наведува во соопштението.
Компанијата истакнува дека се занимава исклучиво со односи со јавност, корпоративни комуникации и стратешко советување.
Воедно, посочуваат дека сите евентуални идни соработки со политички партии ќе бидат транспарентни и јавни.
Претходно, Валентин Манасиевски, член на Централниот комитет на ВМРО-ДПМНЕ изјави „Српска ПР агенција ги штанца лажните соопштенија и прес-конференции на СДСМ“.
Тој обвини дека Зоран Башановиќ, поранешен советник на Зоран Заев, го води ПР тимот на СДСМ и Венко Филипче, додавајќи дека зад комуникацијата стојат лица поврзани со Србија.
Според Манасиевски, Венко Филипче пред неколку месеци, по препорака на Зоран Заев, остварил средба во Ниш со Милјан Счекич, кој, како што наведе, бил ангажиран за креирање на соопштенија и прес-конференции.
Како што рече, станува збор за лице поврзано со српската ПР агенција Eye Media, кое преку Башановиќ било предложено да работи за СДСМ.
Манасиевски тврди дека Башановиќ и Счекич се наоѓаат во Скопје, каде од хотел го координираат, како што изјави, „центарот за лаги и манипулации“ на СДСМ.
Тој додаде дека ова, според нив, ја објаснува содржината и стилот на соопштенијата на СДСМ, како и употребата на, како што рече, „српски фрази и споредби“.
