По неколку години без важечки Колективен договор, Министерството за земјоделство, шумарство и водостопанство денес потпиша нов договор со синдикалните здруженија, со кој се предвидува етапно зголемување на платите и подобрување на работните услови за вработените.
Договорот го потпишаа министерот за земјоделство, шумарство и водостопанство Цветан Трипуновски и претставници на синдикатите, на средба одржана во просториите на Министерството.
Како што се наведува во соопштението, новиот Колективен договор доаѓа по подолг период во кој институцијата функционирала без ваков документ, што создавало неизвесност кај вработените и ограничени можности за унапредување на нивните права.
„Ова е важен чекор, имајќи во предвид дека неколку години немаше важечки Колективен договор, што претставуваше загриженост и неизвесност, како и ограничена можност за унапредување на правата и условите за работа на вработените во ресорот“, се наведува во соопштението.
Со новиот договор, предвидено е зголемување на платите кое ќе се реализира постепено, во период од три години. Овој пристап, според Министерството, треба да овозможи одржлив раст на примањата и стабилност во буџетското планирање.
Покрај платите, договорот опфаќа и мерки за заштита на правата на вработените, како и подобрување на нивниот работен статус и услови за работа.
Од Министерството истакнуваат дека со потпишувањето на Колективниот договор се прави чекор кон создавање на пофер и мотивирачка работна средина.
„Со овој чин ја потврдуваме нашата заложба за градење стабилен, праведен и мотивирачки работен амбиент, во кој трудот на вработените соодветно ќе биде вреднуван, а нивните права заштитени“, се додава во соопштението.
Новиот договор треба да донесе поголема сигурност за вработените во ресорот и да постави основа за понатамошно унапредување на работните односи во институцијата.
