Во Културно-информативниот центар во Скопје вечерва, со почеток во 19:00 часот, ќе се одржи промоција на авторската сликовница „Памук“ од Ника Гавровска и Ѓоко Гавровски, во издание на „Гаврош“.
Станува збор за современо авторско издание што ги спојува литературата и визуелната уметност во една „вистинска бајка“ посветена на темите на растењето, домот и сеќавањето.
Сликовницата „Памук“ е создадена преку хибридна визуелна техника што комбинира рачно изработени минијатурни сетови, ликови базирани на куклена изработка и фотографска илустрација. Секоја сцена е внимателно изградена, осветлена и фотографирана како мал филмски сет, создавајќи специфичен визуелен универзум кој може да се доживее и како книга и како филм во движење.
Овој пристап, како што се наведува, резултира со уникатна атмосфера што ја надминува класичната форма на сликовница и ја доближува до мултимедијално уметничко дело.
Во наративна смисла, „Памук“ претставува дистописка алегорија за патувањето на малиот штрк Памук и неговото семејство низ свет напуштен од луѓето, каде што патот кон дома е заборавен, а со тоа и значењето на самиот поим „дом“.
Со поетска нарација и изразена визуелна длабочина, приказната ја следи авантурата на Памук во потрагата по изгубеното сеќавање и древните патеки што некогаш ги воделе сите птици. Во фокусот е и неговото внатрешно патување – процесот на созревање и постепеното откривање на сопствениот пат.
Ника Гавровска е авторка на повеќе илустрирани изданија, меѓу кои „Бел“ (2019), „Бамбино“ (2022), „Збор по збор“ (2022) и графичкиот роман „Ветерната приказна“ (2023).
Ѓоко Гавровски е мултимедијален уметник, а „Памук“ е негова прва книга во која се јавува како автор на ликовното обликување и визуелната концепција.
Промотор на изданието ќе биде проф. д-р Кирил Пенушлиски.
Промоцијата ќе биде придружена со изложбена поставка на оригиналните експонати и минијатурни сценографии користени во процесот на создавање на книгата, што ќе овозможи увид во визуелниот и материјалниот слој на делото.
Во рамки на настанот ќе се одржи и разговор со авторите, посветен на креативниот процес и концептуалниот пристап зад ова издание.
