Пратеничката на СДСМ, Сања Лукаревска, на собраниска седница апелираше дека е потребна посилна и посеопфатна медицинска поддршка за децата со попреченост и лицата со ретки болести, преку измени во Законот за здравствено осигурување.
Таа посочи дека предложените измени предвидуваат воспоставување на посебна позитивна листа на лекови и суплементи, како и проширување и ревидирање на правото на ортопедски и индивидуални помагала.
„Со предложените измени ќе се овозможи редовно и континуирано следење на здравствените потреби на овие лица, намалување на финансискиот товар врз семејствата и обезбедување правична и навремена здравствена услуга“, рече Лукаревска.
Таа појасни дека целта на законските измени е унапредување на квалитетот на живот и реална инклузија на децата со попреченост. Лукаревска посочи дека постојниот систем не ги следи реалните потреби на корисниците, иако формално постојат механизми како позитивната листа и ортопедските помагала.
„Досегашната пракса покажува дека постојниот систем не ги следи реалните потреби на корисниците и не обезбедува еднаков пристап до неопходната здравствена поддршка“, рече таа.
Таа додаде дека голем број семејства се соочуваат со значителен финансиски товар поради потребата од самостојно обезбедување на терапии.
„Поради тоа, семејствата често се принудени самостојно да ги обезбедуваат потребните терапии, што претставува сериозен финансиски товар и создава нееднаквост во пристапот до здравствена заштита“, појасни Лукаревска.
Лукаревска се осврна и на проблемот со ортопедските и индивидуалните помагала, истакнувајќи дека ограничувањата не ги следат реалните потреби на пациентите.
„Во пракса, тоа доведува до ситуации во кои детето користи несоодветно или дотраено помагало, затоа што не е исполнет законскиот рок за негово обновување“, посочи Лукаревска.
Таа ги образложи и четирите постулати на предложените измени, меѓу кои се проширување на позитивната листа, ревидирање на критериумите, зголемување на опфатот на помагала и почесто нивно обновување.
