Претседателката Гордана Сиљановска-Давкова по повод 24 Мај – Денот на светите браќа Кирил и Методиј, упати порака во која истакна дека делото на солунските браќа и денес има обединувачка моќ и претставува заедничко цивилизациско наследство на словенските народи.
Во објавата, таа нагласува дека светите Кирил и Методиј се „апостоли и заштитници на Европа“, творци на глаголицата и просветители кои овозможиле словенските народи да ја артикулираат својата мисла, вера и културна самосвест на сопствен јазик.
„Јазикот не е само збир на зборови, туку и колективна меморија, вредносен код и чувство на припадност што еден народ ги пренесува низ времето, од генерација на генерација“, наведува Сиљановска-Давкова.
Таа оценува дека без култура, образование и наука, но и без вредносен систем, ниту едно општество не може да изгради доверба и заедништво, особено „во време на неизвесност, длабоки поделби и сè поизразена отуѓеност“.
Во честитката, претседателката потсетува и на историската улога на светите браќа во ширењето на писменоста и духовната еманципација меѓу словенските народи, нагласувајќи дека нивниот подвиг не се состои само во создавањето на азбуката, туку и во отворањето можност народите да се изразуваат на јазик што го чувствуваат како свој.
„Честит 24 Мај, Денот на светите браќа Кирил и Методиј!“, порачува претседателката во својата објава.
