Со конференцијата „Future Shift: Економија, технологија, млади“ официјално започна со работа РЕФОРМ5, соопшти новоформираната организација, чиј прв човек е експремиерот Димитар Ковачевски.
Менталното здравје е најголемиот предизвик со кој се соочуваат младите во Македонија. Истражувањата покажуваат дека депресијата, анксиозноста, стресот и чувството на осаменост се меѓу најчестите проблеми што ја обликуваат секојдневната реалност на младите генерации, се вели во соопштението на Реформ 5 во кое се наведуваат три поенти од конференцијата што го означи почетокот на нивната работа.
Прва поента: Менталното здравје повеќе не смее да биде табу тема. Притисокот од образованието, очекувањата за успех, неизвесноста околу иднината и влијанието на социјалните мрежи создаваат сериозен товар врз младите, кој бара системски одговор.
Втора поента: На младите им е потребна поголема и подостапна поддршка. Загрижува фактот што значителен дел од младите не ја добиваат потребната помош кога се соочуваат со тешки животни ситуации, најчесто поради страв од осуда, стигма или недоверба во системот.
Трета поента: Поддршката за младите започнува во заедницата. Семејството, пријателите, училиштата и младинските организации мора да бидат дел од поширока мрежа која ќе создава безбедна средина за
разговор, поддршка и навремена помош.
Грижата за менталното здравје на младите не е само здравствено прашање – тоа е инвестиција во иднината на државата и предуслов за здраво, продуктивно и отпорно општество.
