Премиерот Христијан Мицкоски јавно ги коментираше заканите упатени кон него на социјалните мрежи, за кои МВР поднесе кривична пријава, а Основното јавно обвинителство Куманово поведе постапка против 39-годишен жител на кумановското село Черкези.
Мицкоски рече дека за случајот дознал вчера и откри дел од содржината на заканите и навредите што, според него, биле упатени кон него и неговото семејство.
„И јас вчера дознав за тие закани, дека сум бил свиња и дека ќе ме колел на плоштад, и упатил пцовки кон мене и моето семејство“, рече Мицкоски.
Тој порача дека очекува надлежните институции да постапат во случајот.
„Јас сум сепак институција. Кога не би бил, знам како се решаваат овие работи. Претпоставувам дека институциите си ги презеле надлежностите. МВР ги презело работите од своите надлежности, се надевам судовите ќе постапат согласно своите надлежности“, изјави Мицкоски.
Според редовниот билтен на МВР, Отсекот за компјутерски криминал при СВР Куманово, во содејство со Секторот за компјутерски криминал и Одделот за криминалистичка полиција при Бирото за јавна безбедност, поднел кривична пријава по брза постапка против А.Д. од селото Черкези. Пријавата е поднесена поради постоење основи на сомнение за сторено кривично дело „загрозување на сигурноста“ по член 144 став 5 од Кривичниот законик.
Од полицијата наведуваат дека на 11 септември пријавениот оставил коментар со заканувачка содржина на објава на профилот на Мицкоски на социјална мрежа.
Основното јавно обвинителство Куманово соопшти дека повело постапка против 39-годишникот поради основано сомнение за истото кривично дело. Според Обвинителството, осомничениот преку пораки на социјалните мрежи го навредувал и му се заканувал на претседателот на Владата.
Надлежниот обвинител побарал определување притвор, наведувајќи ги околностите на извршување на делото, ризикот од бегство и претходното поведение на осомничениот. ОЈО наведува дека тој се јавува како извршител и на други кривични дела од областа на насилниот криминал, меѓу кои насилство и лихварство, како и на поголем број прекршоци за нарушување на јавниот ред и мир.
Според проценката на Обвинителството, постои реален ризик агресивните испади на осомничениот да прераснат во потешки кривични дела со животозагрозувачки последици. За предлогот за притвор одлучува судија на претходна постапка.
