ЏАБИР ДЕРАЛА
Пред шест години (2015), на Божиќ, напишав една честитка на својот профил на социјалните мрежи. И по толку години, честитката целосно ги изразува моите мисли и чувства, значи некои работи не се промениле ни по толку бурни години. Единствената разлика е во мерките за заштита од Ковид-19, кога треба да бидеме дома, да не палиме оган за Бадник, да не се групираме. Впрочем, Божиќ е празник за семејството, како што велат – било кај да си, за Божиќ, дома да си.
Јас сум атеист, но ги знам и ги почитувам сите поголеми верски празници, Божиќ, Велигден, Рамазан, Бајрам, Јом Кипур, Ханука, Пасха…
На огнот на Бадник сум бил присутен само еднаш, пред шест години, кога им се придружив на моите комшии од старото маало во Лисиче. Прекрасен момент. Како сега да е, ги гледам нивните лица, радосни, осветлени од огнот. Два дена подоцна, на Божиќ, го напишав ова:
Завчера вечерта, застанав покрај бадниковиот оган. Музика, блага ракија, греано вино, чај, закуска, насмевки, благост и човечка топлина. Кратко се задржав со моите драги комшии, помуабетивме, си разменивме убави желби и честитки. Заминав брзо, за да не донастинам, иако сакав да останам многу подолго. Отсјајот од огнот допираше до мојот прозорец уште некое време, следејќи го моето чувство на радост. Радост, затоа што знам колку се искрени убавите желби и човечката топлина на луѓето со кои стоев на снегот покрај огнот, во текот на бдеењето или „очекувањето на добрата вест“. Радост, затоа што знам дека не се осамени и дека доаѓаат од сите вери, убедувања и животни патеки.
Исус Христос е инспирација за целото човештво. Тој не е почитуван само од христијаните, туку е дел и од исламската вера. И атеистите, иако постоењето на бога не го признаваат, го уважуваат етичкото учење на Исус кој повикува на правда и еднаквост меѓу луѓето, се бори и жртвува за своите длабоко хуманистички идеи.
Божиќ е време на љубов и давање, време кое не почнува и не запира со деновите на прославата, туку трае постојано и без поделби меѓу луѓето.
Со овие мисли, им го честитам Божиќ на сите мои сограѓанки и сограѓани кои го прифатиле етичкото учење на Исус и го практикуваат во своето секојдневие.
Беше тоа година на тешката двогодишна завршна битка со автократијата и криминалниот режим…
И денеска, на Божиќ (2021), кога дел од денот морам да го поминам во канцеларија, ќе ја искористам паузата за да ги споделам моите најискрени и најдобри желби и надежи со сите мои читателки и читатели и со целиот свет.
Посакувам добрина и човечка топлина да се всели во срцата на сите луѓе и ги повикувам да негуваат почит кон сите луѓе и нивните уверувања. Само така ќе бидат посреќни и поуспешни во животот. Да се ослободат од алчноста и зависта, затоа што само така ќе станат слободни и достоинствени луѓе.
Им посакувам правда на онеправданите, помирување на скараните, утеха на унесреќените, мир на завојуваните, нов дом на бегалците…
Им посакувам здравје на болните и на здравите да останат здрави.
Им посакувам ум на заблудените.
Среќна Нова и Среќен Божиќ.
