На одбележувањето на 25 години од постоењето на Хелсиншкиот комитет за човекови права во Македонија, претседателот Стево Пендаровски им посака следниот јубилеј да го слават во европска Македонија.
– Хелсиншкиот комитет е конструктивен субјект кој алармира за сите општествени девијации. Активно се борите против насилството, корупцијата, дискриминацијата и сите девијации на општеството. Преку вашето делување многу луѓе со посебни потреби ја добија потребната грижа, ги посетивте затворениците, им дадовте глас на `безгласните`, порача Пендаровски во своето обраќање.
Тој појасни дека Хелсиншкиот комитет ги штити правата на ЛГБТ заедницата, се залага за правично судење, реагира на говорот на омраза, а според него овие теми „ќе беа на маргините на јавниот дискурс, ако не алармиравте“.
– Вие ги направивте видливи, граѓаните кои беа невидливи за општеството – додаде Пендаровски.
Тој смета дека членовите на Хелсиншкиот комитет подобро од него знаат дека борбата за овие права не е завршена. Секоја генерација постојано мора да ги повторува овие заложби за да ги постигне човековите права – порача Пендаровски.
– Етничката разделеност, жигосувањето на нееднаквите се само дел од непотребните појави кои секојдневно ги наоѓаме во нашето општество – смета претседателот.
Тој рече дека еднаквост се постигнува кога правата на најмалата заедница се еднакви на најголемата заедница. – Не треба посилниот да има надмоќ над послабиот -додаде Пендаровски.
Претседателот смета дека човековите права постојано треба да ги унапредуваме и постојано треба да ги препорачуваме конвенциите и декларациите кои ги гарантираат овие права.
– Наша клучна цел мора да биде општество ослободено од предрасуди. Вториот момент се европските интеграции кои се стремат кон почитување на човековите права. Посакувам до следниот јубилеј да изградиме европска држава која се грижи за своите граѓани подеднакво, рече Претседателот.
Б.Б.
