Интензивирањето на соработката на полето на безбедноста на храната, здравствената заштита и благосостојбата на животните со Соединетите американски држави, преку унапредување на институционалната и бизнис соработка, беа дел од темите на разговор на денешниот работен состанок меѓу директорот на Агенција за храна и ветеринарство (АХВ) Николче Бабовски и Ендрју Мофад, офицер за политички и економски работи во Американската амбасада.
На состанокот, информираат од АХВ, беше истакната досегашната добра соработка на Агенцијата со стручните служби на САД, соработката во рамки на Организацијата за земјоделство и храна на Обединетите Нации – ФАО, Codexs alimentarius и регионалните проекти, а разгледана беше и иницијативата за унапредување на институционалниот капацитет на АХВ на полето на здравствената заштита и лабораториските капацитети.
Директорот Бабовски ги претстави активностите и приоритетите на кои работи Агенцијата за храна и ветеринарство на полето на безбедноста на храната, здравствената заштита и благосостојбата на животните, како и тековните проекти кои се реализираат.
Американскиот претставник Мофад, пак, ги презентираше активностите кои ги реализираат во регионот на полето на биотехнологијата и најави можност за вклучување на земјава во регионалниот проект, чија реализација треба да почне наскоро, во кои ќе бидат вклучени соседна Србија, Грција и Хрватска.
Во поглед на трговските односи со САД, Бабовски потенцира дека државава продолжува со реализација на извозот на мали, но квалитетни земјоделски производи (сирење) на американскиот пазар и дека се прават напори за зголемување на асортиманот за пласман и на други македонски земјоделски производи во оваа земја.
Високиот претставник на САД во земјава го истакна задоволството на САД од работењето на стручните служби на Агенцијата за храна и ветеринарство при реализација на досегашниот извоз на американски производи во земјава, најавувајќи дека покрај пласманот на пилешко и свинско месо, американски бизнис оператори се заинтересирани и за извоз на говедско месо во земјава.
Од негова страна беа објаснети новите политики на САД во областа на земјоделското производство, екологијата и климатските промени, области во кои може и треба да се интензивира и идната соработка меѓу двете земји./МИА/