Во сите мои настапи секогаш апелирам за соработка со опозицијата и за наша подготвеност за прифаќање на аргументите кои ги има опозицијата, сè во интерес на државата. Затоа и ја отворив оваа перспектива да разговараат и да размислуваат сите. За танго требаат двајца за оро требаат повеќе. Треба да одиграме за државата онака како што мислиме дека е најдобро за целиот народ, одговори премиерот Заев на денешната прес-конференција, на новинарското прашање за соработка со опозицијата.
Тој нагласи дека се направени досега многу напори за тоа да се оствари, но за жал до сега тоа е безуспешно
„Се обидовме со многу законски решенија, се обидовме со важните стратешки прашања за државата – НАТО, ЕУ, но од 2017 наваму немаме успех. Драго ми е што државата чекори напред, денеска сме членка на НАТО, после 15 години лани во март добивме одлука за почеток на преговорите со ЕУ. Многу работи се придвижија пред се на економски план и покрај сите блокади и не гледам дека со понатамошни блокади ќе имаме добробит за државата, туку со консензус за сето она што е возможно да се постигне и тогаш имаме гаранција за успешност на сите политики, а тогаш е и ефикоснаоста, брзината, развојот на државата, растот на економијата се секако поизвесни. Затоа нема да престанеме да се обидуваме и со македонската и со албанската опозиција.“, рече Заев.
Премиерот ги истакна како позитивни соработките во првиот мандат и со албанската опозиција и со дел од пратениците на ВММРО-ДПМНЕ
„Во првиот мандат со албанската опозиција имав чест да постигнам многу значајни договори, затоашто и тие веруваа во истите политики, веруваат во НАТО и ЕУ. Истото не би го кажал за ВМРО-ДПМНЕ, затоа што еве не успеавме ништо да постигниме. Лицето на ВМРО-ДПМНЕ го сочуваа единствено оние пратеници од ВМРО-ДПМНЕ кои тогаш ги поддржаа уставните промени, заради наше членство во НАТО и почеток на преговори со ЕУ.“, истакна Заев.
Заев за несоработката при донесувањето на некои законски решенија, запраша на кого би му сметало донесувањето на истите ако се во корист на сите во државата,
„Се обидовме со Клиничкиот центар, со Законот за бесправните градби и други закони, но безуспешно. Кој има корист од спречување на Законот за бесправни градби и легализација? Најголем дел од сиромашните граѓани ги немаат легализирано своите куќи. Нема легализација на колективните згради. Кој има корист од закочените закони за екологија, од Законот за трамвај на тркала во Скопје, од Законот за енергетска ефикасност… Не гледам разумност во ова. Деновиве се прават напори за неколку излезни решенија за Законот за АВМУ. Потврдувам дека СДСМ немаат никакви партиски кандидати и кадри за програмски совет за совет на АВМУ. Законот за да се спроведе потребно е 2/3 мнозинство сè со цел да се одблокира законот кој е донесен пред неколку години.“, рече Заев.
„Испраќам порака на соработка сегаде каде што е тоа возможно. Сакам дијалог и ако некој успеал во дијалогот да изнајди решенија низ разговор тоа сум го постигнал како претседател на владата, а верувам дека може да се постигне пак. Не е лесно објасниво дека може со сите надвор да постигнете договор, само дома со опозицијата да не можете да го постигнете тоа. Убеден сум дека е возможно, но за жал имаме многу пречки и блокади кои мора да бидат отстранети, одговори премиерот Заев на новинарското прашање.
J. Ѓ.
