Даниела Рангелова, претседателка на Комисијата за еднакви можности во Собранието на Република Северна Македонија на панел дискусијата “Улогата на мажите во родова еднаквост” во организација на Националниот демократски институт, истакна дека најпрвин проблемот со родовата еднаковст треба да се адресира кај самите жени, пред да се постави прашањето зошто мажите не ги поддржуваат.
„Ако велиме дека има сексистички напад кај некоја жена, иницијативата за тие говори на омраза претежно доаѓа од женски говори. Најчести пречки, на пример, на некои жени во развој на нивните кариери, биле токму жените. Борбата против родова нееднаквост најпрвин лежи во клиентелизмот во политичките партии“, изјави Рангелова сметајќи дека придонес кон тоа ќе даде и нов изборен модел каде ќе нема квоти, со поддршка на модлот една изборна единица.
„Иницијативата за собирање потписи за застапеност од 50% на жените на листите, кога ја почнав со понуда на жените да се потпишат, првото прашање што ми се постави беше дали е договорено со партијата. Првиот пат кога ќе се осмелите еден збор да кажете против партијата, тие ќе ве линчуваат и ќе бидете осудени и од партијата и од општеството… Добив порака од лидерот на партијата: кој ти дозволи да го правиш ова. Бидејќи јас имам поголемо искуство во политиката, од сегашниот лидер, му реков, искуството што го имам со жените во изминатиот период, има ли проблем, ми вели има ако не е договорено. Кога, пак, им се обратив на пратеничките и оние од СДСМ, морам да кажам, за жал, ми рекоа ние мора прво да прашаме во партија“, изрази жалење Рангелова за постоечкиот партиски и политички клиентелизам.
Според Рангелова, Инцијативата ја подржале најхрабрите, ослободени од политички притисок во нивните партии, претставниците на помалите политички партии, независните пратеници и прво се потпишале повеќе мажи отколку жени.
„За жал, имаше мажи што не се потпишаа. На пример, Антонио Милошовски кој што ми кажа која си па ти да кажуваш што треба, аман веќе, ги повампиривте жените во цела партија. И слични на него. Потоа од нив очекуваме да се борат за нас во партијата и да имаме еднакви можности понатаму“, изјави Рангелова.
За крај, нејзиниот заклучок беше дека борбата за родовата еднаквост е заедничка со меѓусебна поддршка бидејќи не се работи за борба на мажи и жени, туку на општеството.
Панел дискусијата ја организираше Националниот демократски институт во рамки на Неделата на женски права и родова еднаквост. Говорници, освен Даниела Ранглеова, беа Дамјан Манчевски, министер за информатичко општество и администрација; Фадил Зендели, претседател на Постојаната анкетна комисија за заштита на слободите и правата на граѓанинот, Собрание на РСМ, Џабир Дерала, претседател на ЦИВИЛ и Даниела Димитриевска, извршна директорка на Македонското женско лоби.
Биљана Јордановска
Discussion about this post