Само 28 проценти од компаниите во нашата земја се дигитално зрели, 42 отсто се компании со средна дигитална зрелост, а 30 проценти се компании со ниска дигитална зрелост, покажува истражувањето за дигиталната зрелост на малите и средни компании на Македонски Телеком, во соработка со ИПСОС.
Во однос на дејноста, истражувањето покажува дека компаниите од областа на градежништво се со најголем, a компаниите од областа на малопродажба се со најмал удел во дигитално зрели компании.
Ова е први истражување од ваков тип во нашата држава и е спроведено на репрезентативен примерок од 530 компании.
Целта на истражувањето, како што информираат од Македонски Телеком, е да се види реалната слика, а податоците ќе се искористат да им се помогне на малите и средни бизниси успешно да се дигитализираат. Со анализата е опфатено колку македонските компании ги практикуваат дигиталните сегменти: онлајн комуникација, онлајн маркетинг, безбедносни услуги, доверливи услуги, користење на софтвер и серверски услуги и колку тие се свесни за нивната важност како услов за деловен развој.
– Во земјава големите компании имаат многу повисок дигитален индекс (ниво на користење на дигитални услуги), што не е случај со малите и средни компании. Дури 37 проценти од компаниите со 1-9 вработени не практикуваат дигитални алатки, 93 проценти од нив не овозможуваат онлајн плаќања за своите корисници ниту пак користат онлајн заштита. Истражувањето покажа дека голем број компании од овој сегмент сѐ уште немаат своја веб-страница, профили на социјалните платформи, ниту пак се грижат за безбедноста на податоците, се вели во соопштението од Македонски телеком.
Спротивно на нив, дигитално зрелите компании, благодарејќи на употребата на дигитални алатки, поуспешно се справиле со Ковид кризата и побрзо се вратиле во нормала, а имале и помал пад на приходите.
Според главниот комерцијален директор за деловни корисници, Гоце Митевски, дигиталните алатки се неопходни за бизнисите, а нивниот трансформативен ефект најмногу дојде до израз во време на пандемијата на Ковид-19.
– Наша одговорност како лидер за дигитализација не е само да понудиме услуги, туку и да поттикнеме што е можно поголем опсег на дигитална трансформација. Оттаму и идејата да го спроведеме истражувањетои да им понудиме на малите и средни бизниси период на користење на нашите дигитални услуги без надомест, како и едукација преку вебинари и така сите заедно да работиме на дигиталната зрелост којашто е предуслов за успех на бизнисите денес, изјави Митевски, се вели во соопштението.
Дигитално зрелите компании, покажува истражувањето, користат комбинацијата од повеќе дигитални канали како што е веб страница на компанијата (98%) и социјалните медиуми (100%).
Онлајн комуникацијата со корисниците преку социјалните медиуми е присутна кај 60% од дигиталните компании, додека пак 48% користат веб форми за комуникација со корисниците. Околу 90% од нив користат софтверски алатки во секојдневното работење, а 69% имаат сервери за хостирање на веб страници , е-пошти, складирање на податоци или бази на корисници.
Резултатите од истражувањето се презентираа на првиот вебинар од серијата вебинари – „Дигитализација, сега!“ за вистинските чекори за дигитална трансформација на малите и средни претпријатија.
Од Македонски Телеком, исто така, информираат дека на малите и средни компании им нудат период на користење на дигиталните услуги без надомест со цел подобро да се запознаат со услугите, нивното едноставно функционирање и потенцијалот којшто тие го нудат за успешен бизнис.
извор: МИА
