Пратеничката Фросина Ременски дојде во Обвинителството за гонење на организиран криминал и корупција за да изврши увид во доказите собрани во истрагата за невладината органзација „Меѓународен сојуз“, чија почесна претседателка беше токму таа.
Можност за увид во доказите имаат и првоосомничениот Бојан Јовановски – Боки 13, кој беше претседател на организацијата, како и неговиот татко Миле Јовановски.
Овој дел на истрагата, која Обвинителството ја отвори на 9-ти октомври против пет лица, се однесува на измамите со изградба на центри за возрасни лица, за кои беа барани пари од бизнисмените Силјан Мицевски, Ардијан Амзоски и други.
Од Обвинителството соопштија дека врз основа на предистражната постапка обвинителот што раководи со постапката, дошол до сознанија што укажуваат дека во периодот од јули 2017 до април 2018 година, првоосомничениот Боки 13 како претседател на осомниченото правно лице, искористувајќи документи од правното лице, довел и одржувал во заблуда двајца управители на две друштва за градежништво.
-Тој лажно прикажувајќи дека ќе обезбеди државно неизградено земјиште за изградба на центар за возрасни лица и мобилен сервис, а потоа и субвенционирање од страна на државата, од оштетените преку авторска агенција успеал да добие парични средства од 719.905 евра од едното правно лице и 233.821 евра од другото. Останатите осомничени лица со умисла му помагале на првоосомничениот во извршувањето на кривичните дела изготвувајќи договори, подигнувајќи ги уплатените средства и уплаќајќи средства на други правни лица по основ на позајмица или донација, информираа од Обвинителството.
Ременски во октомври по давањето исказ пред судија на претходна постапка кажа дека не чувствува никаква вина.
По отворањето на случајот „Рекет“, Обвинителството отвори уште една истрага за „Меѓународен сојуз“.
