Ниту оваа, ниту пак која било влада има право да разговара за македонскиот јазик и македонски идентитет, нагласи премиерот Зоран Заев на вчерашната собраниска седница на која беа поставувани пратенички прашања. Истовремено од Брисел, по пристигнувањето на дводневниот Европски совет, претседателот на Бугарија, Румен Радев ја забетонира уценувачката бугарска позиција дека брзото движење на Република Северна Македонија кон ЕУ ќе зависи само од дијалогот со Бугарија.
Сто илјади вакцини „Фајзер“ преку Ковакс механизмот се очекува да пристигнат денеска во државава. Вакцините ќе се складираат во поликлиниката „Јане Сандански“ и на Институтот за судска медицина. Откако ќе биде добиена дозвола за пуштање на сериите во промет од Агенцијата за лекови тие ќе се дистрибуираат низ државата од почетокот на следната недела. Ова го најави министерот за здравство Венко Филипче, кој рече дека задутре во 14 и во 16 часот на аеродромот во Скопје ќе пристигнат 500 илјади дози од вакцините „Синовак“.
Законите за спречување и заштита од дискриминација и заштита и спречување од насилство врз жените и семејно насилство се два круцијални закони кога се работи за човековите права. Наш партнер во креирањето на подзаконските акти и имплементацијата е граѓанскиот сектор, вели Шахпаска. Таа истакна дека за успешна имплементација на Законот за спречување и заштита од насилство врз жените и семејно насилство потребен е еден мултисекторки пристап во процесот на обука.
Земјава и денеска ќе биде под влијание на топол бран со високи температури од портокалова (алертна) фаза. Надлежните апелираат да се почитуваат општите мерки за заштита на здравјето, да се ослободат од работните обврски најранливите групи, вклучувајќи ги бремените жени, како и лицата на возраст над 60 години, а децата од градинките да не се изнесуваат на отворено од 11 до 17 часот.
Европските интеграции не смеат да бидат заложник на билатерални прашања. Преговорите со ЕУ не смеат да се претворат во преговори со Бугарија. Нашиот напредок во ЕУ интеграциите првенствено треба да зависи од домашните реформи врзани со поглавјата, законодавството на ЕУ и постигнување на европските стандарди, напиша премиерот Зоран Заев на неговиот фејсбук профил.
М. Миткоска
