СДСМ со загриженост го следи развојот на настаните со пожарите кои зафатија голем дел од територијата на државата. Станува збор за катастрофа од големи размери, во која за жал има и човечки жртви, предизвикана е голема материјална штета и сериозно нарушување на природните ресурси. Во вакви сложени услови ја искажуваме нашата поддршка на сите надлежни институции на централно и локално ниво кои се справуваат со пожарите, пишува во партиското соопштение.
„Системот функционира, државата е тука за граѓаните, бргу се организира и веќе е воспоставена контрола на постоечките жаришта. Обезбедена е и меѓународна поддршка со чија помош ќе успееме полесно да се справиме со овој предизвик.
Кризната состојба ќе им овозможи на институциите на посоодветен начин да ги планираат и спроведуваат активностите и ќе овозможи активирање на сите капцитети со кои во моментов располага Република Северна Македонија.
Оваа криза покажа дека имаме систем и дека како држава уживаме меѓународен углед, имаме пријатели и во регионот и во Европа“, пишува во соопштението на СДСМ.
Оттаму се заблагодаруваат за секоја подадена рака.
„Граѓаните знаат дека институциите, припадниците на полицијата, на армијата, а пред се на противпожарната служба, прават натчовечки напори да се изборат со овој нов многу сериозен предизвик.
Благодарни сме на големиот број граѓани кои се одзваа на повикот за помош и поддршка во гаснењето на пожарите и апелираме до секој поединец за внимателен однос и строго почитување на забраната за движење во шумите. Да ја сочуваме државата, да ги сочуваме ресурсите за чие обновување ќе биде потребно долго време. Солидарно, сите заедно да помогнеме за полесно справување со пожарите и отстранување на последиците.
Уште еднаш се покажа дека луѓето се најсилниот капитал на секое општество. Како што лекарите изминатите 18 месеци се борат за нашите животи, така сега пожарникарите, полицајците, војниците, но и граѓаните доброволци, се борат за нашите животи, за нашите шуми, за нашиот имот и за нашите природни ресурси. Им благодариме!“, се вели во партиското соопштение.
