Претседателот на Република Северна Македонија, Стево Пендаровски денеска во својот кабинет оствари средба со Зара Назариан, генерална секретарка на Унијата на франкофонските новинари, по повод формирање на Франкофонско здружение на македонски новинари како полноправна членка во Меѓународното франкофонско здружение.
Од Кабинетот на претседателот информираат дека за време на средбата генералната секретарка Назариан го информирала претседателот Пендаровски за тековните активности на Унијата на франкофонските новинари и заложбите за промовирање на културната и јазична разновидност, и европските вредности за слобода на говор како една од основните придобивки на демократските општества.
–Претседателот Пендаровски поздравувајќи го формирањето на франкофонското здружение на новинари во Северна Македонија, ја нагласи важноста од членувањето на македонски новинари во Унијата, како можност за институционална соработка во рамките на Европската Унија, како и размена на искуства во насока на континуиран развој на етичките вредности и професионалните стандарди и принципи, се вели во соопштението.
извор: МИА
