Остануваат само неколку денови до формирање техничка влада. Откако владејачкото мнозинство и опозициската ВМРО-ДПМНЕ постигнаа договор да бидат усвоени законски предлози кои се врзани со примена од 1 јануари, а кои претходно беа блокирани од опозицијата. Премиерот Заев во неколку наврати предупреди дека изборите може да бидат одложени сè додека опозицијата во Парламентот ги блокира законите од кои зависат платите, пензиите и инвестициите, пишува DW на македонски јазик.
Љупчо Николовски од СДСМ пред неколку дена најави дека неговата партија денеска, в петок ќе одлучува за кадровските предлози, кој ќе ја предводи техничката влада. Во медиумите досега беше објавено дека на чело ќе застане првиот човек на МВР, Оливер Спасовки, а во „игра“ беше и министерската за труд и социјална политика Мила Царовска.
Вечерва СДСМ ќе решава за кадровски прашања поврзани со техничката влада. На седница на Централниот одбор треба да биде избран кандидатот за технички премиер, кој ќе ја преземе функцијата откако премиерот Зоран Заев ќе поднесе оставка на функцијата. Според Изборната регулатива тоа треба да се случи 100 дена пред изборите, а со оглед дека тие се договорени за 12-ти април, последниот рок е трети јануари. На седницата на ЦО треба да бидат предложени и дополнителни замeници министри, како и кадровски предлог за нов вицепремиер за економски прашања, по најавеното повлекување на Кочо Анѓушев од таа функција.
Извршниот и Централниот комитет на ВМРО-ДПМНЕ вчера одржаа седници, но сè уште е непознато кои се кандидатите што партискиот претседател Христијан Мицкоски ќе ги предложи во техничката влада.
Засега е само извесно дека Мицкоски е партиски кандидат за мандатар, и дека ВМРО-ДПМНЕ е уверена во изборна победа.
„Централниот и Извршниот комитет дадоа целосна едногласна поддршка на претседателот на партијата, Христијан Мицкоски, да биде новиот мандатар, односно кандидат за мандатар по завршување на изборите на 12-ти април, на коишто ВМРО-ДПМНЕ ќе издвојува убедлива победа“, изјави Генералниот секретар на партијата, Игор Јанушев.
Опозициската ВМРО-ДПМНЕ ќе треба да предложи технички министри за два ресора: за внатрешни работи и за труд и социјална политика. Во тие ресори дополнителните заменици министри треба да бидат предложени од владејачката коалиција. Опозицијата, пак, ќе треба да предложи и дополнителни заменици министри во три ресори: финансии, земјоделство, и администрација и информатичко општество.
За утре, сабота, закажана е средба Заев-Мицкоски на која ќе се водат консултации за предлозите за техничката влада.