Временската прогноза ја подготви: СНЕЖНАТА КРАЛИЦА
Времето над политичката сцена деновиве е магловито со блесоци во економијата.
Над „белата палата“ од синоќа се надвива густа магла, од која не можат да се видат предлозите за технички министри во преодната влада, што треба од 3 јануари во следните 100 дена да ја води државата до избори.
Времето околу „Бихаќска“ пак, деновиве се колебаше од облачно преку ветровито до сончево, откако лидерот и премиер Зоран Заев не беше одлучен дали на 3 јануари ќе даде оставка, поради блокадата на повеќе закони во Собранието од страна на опозицијата. Откако владејачката партија настапи фронтално, од тоа што се најавуваше да биде опозициски циклон, остана само промаја, па денеска глатко се гласаат закони кои ќе важат од 1 јануари.
Вечерва на „Бихаќка“ ќе преовладува умерено топло, но крајно неизвесно време, кога ќе се решава за кадровските прашања поврзани со техничката влада. На седница на Централниот одбор треба да биде избран кандидатот за технички премиер, кој ќе ја преземе функцијата откако премиерот Зоран Заев ќе поднесе оставка на функцијата. Дали и овој дел од Скопје ќе остане во магла како околу „белата палата“ ќе дознаеме вечерва.
Сепак, сонцето од зградата на Собранието успеа да ги растера облаците на економско поле, по констатацијата дека таа „блеска“, ако се знае дека на 1 јуни 2017 година јавниот долг беше 48,6 отсто од БДП, а сега е 47,7 проценти. Намален е за 0,9 отсто.
Во тој контекст, денеска од ИПАРД 2 почнаа да врнат пари, па утре ќе биде објавен повик за инвестиции во преработка и маркетинг на земјоделски и рибни производи проектиран на 13,3 милиони евра.
Врнежливо и во образованието, каде од 1 јануари се очекува зголемување на платите на наставниците за 10 отсто, откако денеска беше потпишана спогодба меѓу Самостојниот синдикат на образование наука и култура (СОНК) и Министерството за образование и наука.
Да заврне очекуваат и Ромите од Тризла во Прилеп, по пресудата на Апелацискиот суд во Битола, кој ја преиначи пресудата на Основен суд Прилеп и утврди дека Општина Прилеп и ЈКП Водовод и канализација Прилеп извршиле дискриминација спрема тужителите, со тоа што им оневозможиле пристап до чиста и здрава вода за пиење.
Громови се слушаа во претпладневните часови од Кривичниот суд, додека судијката ја читаше пресудата во случајот „Тарифа“ за кој поранешниот директор на АД ЕЛЕМ, Дејан Бошковски, и ресорните директори Методиј Стојменовски и Ненад Ѓорѓовски ги осуди на казна затвор од по три години за злоупотреба на службената положба и овластување. На спомнатите директори им се стемни, а наскоро околу нив ќе завладее тригодишна зима.
