Тимот за односи со јавноста на новата градоначалничка на Град Скопје, Данела Арсовска, покажува конзервативни манири, својствени за партија како ВМРО-ДПМНЕ, иако Арсовска сакаше да се претставува како независна кандидатка.
Во објавите на социјалните мрежи за активностите на Арсовска, нејзиниот тим ја ословува градоначалничката како „градоначалник“, неводејќи грижа за родовата еднаквост и позицијата на жените во општеството.
На ова реагираа голем број на граѓани, кои ја критикуваа оваа практика во коментарите и бараат Арсовска да се ословува со правилниот термин „градоначалничка“.
„Ауу вие стварно имате сериозен проблем со зборот градоначалничка“, „Градоначалничка! Си постои зборот во македонскиот јазик, употребете го“, се само дел од коментарите под објавите на социјалните мрежи на Град Скопје.
По бројните коментари на последната објава, тимот на Арсовска, попушти и направи промена и го смени терминот од „градоначалник“ во „градоначалничка“. Сепак, граѓаните очекуваа поголема почит за родовата еднаквост и општо, поголема почит за жените, од градоначалничката на Скопје и нејзината администрација.
