Почитувани претставници на медиумите почитувани граѓани, најпрво го изразувам моето најдлабоко жалење за жртвите во несреќата. Несомнено ова е еден од најтажните денови во поновата македонска историја. Министерството за транспорт и врски во соработка со другите институции и бугарските власти максимално работи на утврдување на сите причини за настанатата несреќа, истакна министерот Бочварски на вечерашната прес-конференција.
– Превозникот до Министерството за транспорт и врски доставил барање на 18.07.2018 за добивање на лиценца за вршење на меѓународен транспорт на патници. Кон барањето превозникот доставил уредна документација со важечки потврди за исполнување на техничко-експлоатационите услови со еуро стандард на возилата Еуро 3 стандард и Еуро 4 стандард. Исто така, доставил и список од ПИОМ на вработени возачи во редовен работен однос. Со барањето за добивање на лиценца за вршење на меѓународен слободен превоз на патници, превозникот ги исполнил условите за добивање на лиценца и издадена му е лиценца за вршење на меѓународен слободен превоз на патници со сериски број 007017 со важност од 08.08.2018 година до 08.08.2022 година, објасна министерот.
– Според комплетната документација содржана во системот на Министерството за транспорт и врски , превозникот до овој момент има уредна лиценца за вршење на меѓународен слободен превоз на патници, истакна Бочварски.
-Во системот на Министерството за транспорт и врски конкретниот превозник е заведен со 4 возила кои поседуваат лиценца за превоз. Според член 11 став 1 од Законот за превоз во патниот сообраќај, превозникот може да започне да врши превоз на патници во внатрешени и меѓународен патен сообраќај, откако ќе добие лиценца и извод од лиценца за моторно возило. По добиените информации од Министерството за внатрешни работи за опожареното возило, констатиравме дека истото не било пријавено од страна на превозникот согласно член 11 став 5 од Законот за превоз во патен сообраќај и поради тоа возилото го нема во електронската база на податоци на Министерството за транспорт и врски, рече Бочварски.
При констатиран недостаток во работењето и по предлог на Државен инспекторат за транспорт, Министерството за транспорт и врски може да ја одземе лиценцата за работа на превозникот, информира министерот.
М. М.
