Премиерот на Бугарија Кирил Петков потврди дека на 18 јануари ќе ја посети Република Северна Македонија, во одговор на седница за пратенички прашања во Народното собрание.
Како што јави дописникот на МИА од Софија, Петков го изјави тоа во одговор на прашање на поранешната министерка за надворешни работи Екатерина Захариева.
Петков рече дека добрососедството е многу важен принцип во односите меѓу Бугарија и Северна Македонија. Тој додаде дека ставот на Бугарија за преговарачкиот процес со Република Северна Македонија е зачуван токму онака како што е договорено во коалицискиот договор меѓу партиите во владејачката коалиција. Ставот е ист, вели тој, но владата во Софија го надградува со пет посебни различни комисии за надградба на овие односи.
Петков изрази чудење зошто во 2021 година немало ниту еден лет од Софија до Скопје, како и ниту една железничка линија. Тој праша и зошто Бугарија и Северна Македонија немаат заеднички културен календар, како и зошто нема интеракција меѓу бизнис секторите на двете соседни земји.
Петков увери дека има апсолутно јасен заеднички став во коалицијата, како и целосна координација во Советот на министри на Бугарија на темата.
-Со одењето на разговори на 18 јануари покажуваме дека добрососедството е фундаментален принцип на нашите односи со Република Северна Македонија. Се надевам дека нашата Влада ќе ја покаже разликата меѓу добрите планови и постигнатите резултати, рече во заклучокот бугарскиот премиер Кирил Петков во Народното собрание.
Извор: МИА
