Оваа годишнина, како и одбележувањето 15 години од приемот на Република Бугарија како полноправна членка во ЕУ, како симболични датуми ќе бидат преточени во еден нов датум, кој ќе биде препознаен по решавањето на отворените прашања меѓу двете соседни и пријателски земји со што ќе се создадат услови за заедничка иднина во европското семејство, истакнал премиерот Димитар Ковачевски на денешната средба во Софија со претседателот на бугарското Собрание, Никола Минчев.
Како што соопшти владината прес-служба, на средбата премиерот Ковачевски го поздравил одбележувањето на 30-годишнината откако Република Бугарија прва донесе одлука да ја признае Република Македонија на 15 јануари 1992 година, со што беше отпочнат процесот на верификација на нашата држава на меѓународен план и на воспоставувањето на дипломатски односи со повеќе држави.На средбата била истакната како исклучително значајна иницијативата на парламентите на Бугарија и Северна Македонија за потесна соработка и во дополнителни формати, покрај оние кои веќе постојат како стандардни пратенички групи за соработка меѓу пратениците на двете земји.
Во состав на владина делегација предводена од премиерот Димитар Ковачевски беа и првиот заменик на претседателот на Владата и министер за политички систем и односи меѓу заедниците Артан Груби, заменик-претседателката на Владата задолжена за политики за добро владеење Славица Грковска, министерот за надворешни работи Бујар Османи и министерот за локална самоуправа Горан Милевски.
