Најголем број од младите во земјите од иницијативата „Отворен Балкан“ или над 70%, не сакаат да продолжат со онлајн настава и сметаат дека ниту тие, а ниту професорите не вложуваат доволно напори за квалитетна настава преку интернет што резултира во ниско до средно ниво на стекнато знаење и несоодветна едукација.
Ова го покажува онлајн истражувањето на Институтот за добро управување и евроатлантски перспективи (ИДУЕП) спроведено помеѓу ученици и студенти од Македонија, Србија и Албанија во текот на месец Јануари 2022 година. Впечатлив и заеднички став на младите од трите земји е податокот дека, помалку од една третина од нив е за продолжување на онлајн наставата, додека останатите се залагаат за настава со физичко присуство или за комбиниран хибриден модел.
При тоа само 14,6 % од младите во Албанија сакаат да учат онлајн, додека 44% се за физичка настава, а 41,4% се изјасниле за комбиниран модел. Во Македонија 27% од учениците и студентите вклучени во онлајн истражувањето се за онлајн модел, 41% сакаа да се вратат во клупа, додека 32 се за комбинирана модел на онлајн и физичка настава. 21% од младите Срби, пак, повеќе сакаат да учат онлајн, 37% се за настава во училиштата, додека 42% посакуваат да имаат можност и за онлајн и за физичка настава.
Карактеристики и наоди од онлајн анкета спроведена во Македонија
Младите во земјава, слично како и младите испитаници од другите земји од иницијативата „Отворен Балкан“, Србија и Албанија сметаат дека најголемиот недостаток или маана на онлајн наставата е недоволна подготвеност и опременост за нејзино квалитетно спроведување, намалување на квалитетот на стекнатите знаења, намалена контрола на знаењата, намалување на критериумите за оценување, недостаток на неопходната социјализација и интеракција, како и тоа што немало доволна интеракција со останатите ученици и професори, па се до дефицит на внимание и зголемена анксиозност.
Токму на овие наведени недостатоци се темелат и препораките како да се подобри онлајн наставата, односно тие сакаат поголема интеракција, повеќе активности, дигитализација на поголемиот дел од процесите како и максимално искористување на предностите на интернетот за надоградба на знаењето.
Исто така бараат и подобар тренинг за професорите за да може да ги направат предавањата поинтересни со што ќе влијаат и врз квалитетот на пренесеното знаење и интерес кај учениците.
Во прилог графикони од добиените одговори на национално ниво:
