Министерката за труд и социјална политика Јованка Тренчевска, заедно со премиерот Димитар Ковачевски и директорот на Агенцијата за вработување, Беким Мурати денеска ја посетија ИТ компанијата „Маџикс“, соопштуваат од Министерството за труд и социјална политика.
При средбата со младата претприемачка Катерина Здравева и вработените, министерката рече дека стартап компанијата е вистински пример дека владините мерки за самовработување се успешни, бидејќи за двеипол години таа бележи значителни резултати, не само на домашниот туку и на странскиот пазар.
Поради големиот интерес за дигиталните вештини Тренчевска најави дека и со новиот Оперативен план за оваа година Владата и Министерството за труд и социјална политика креираат мерки за вработување во областа на ИТ секторот.
„ Успешната работа на оваа компанија и средбата со вработените ни даваат уште поголем поттик да вложуваме во младите луѓе. И со новиот Оперативен план за 2022 година продолжуваме со активните мерки и програми за вработување, бидејќи покажаа дека со стекнатите вештини граѓаните се враќаат на пазарот на труд како поконкурентни. Следејќи ги веќе стекнатите искуствата, за реализација на новиот Оперативен план за 2022 година одвоивме рекорден буџет кој изнесува 1,73 милjaрди денари (28 милиони евра), што значи повеќе од двесте милиони денари од буџетот за Оперативниот план за минатата година, кој изнесуваше 1,5 милјарди денари“, рече министерката Тренчевска.
Сопственичката на компанијата Здравева посочи дека се задоволни од владината мерка за самовработување бидејќи сега имаат фирма која бележи успех. Најави дека во иднина планира да го зголеми бројот на вработени лица.
За премиерот Димитар Ковачевски ИТ компанијата Маџик претставува гордост за државата, ваквите фирми имаат големо значење не само за сопствениците и вработените, туку и за македонската економија во целост.
Реализацијата на Оперативниот план за 2021 година покажа најголем интерес за мерката „Обуки за развој на дигитални вештини“ во која беа вклучени 400 невработени лица, како и за мерката за самовработување, која имаше 100% реализација.
