Навршуваат две години по смртта на Ли Венлианг, лекарот кој се обиде да ја предупреди Кина за коронавирусот, а и самиот му подлегна. Сеќавањето на него останува мешавина од тага, гнев и надеж за многу Кинези, пишува Њујорк Тајмс.
Офталмологот д-р Ли од Вухан (каде почна пандемијата) привлече внимание на национално ниво откако кон крајот на декември 2019 година, ги предупреди пријателите на социјалните мрежи за појава на нов, мистериозен вирус во неговата болница, но бил опоменат од локалната полиција поради ширење на гласини.
Кога владата со задоцнување потврди дека навистина се шири вирус, д-р Ли станал национален херој и олицетворение на важноста на слободното изразување. Но, доктор Ли набрзо се разболел од вирусот и на 6 февруари 2020 година, починал.
Корисниците на кинеските социјални медиуми експлодираа во бес и тага, како за судбината на д-р Ли, така и за бавниот одговор на владата на избувнувањето на вирусот. Многумина пишувале на профилот на д-р Ли на Weibo (платформа слична на Твитер) за да му се заблагодарат за храброста да зборува, се извинија за неговиот третман од властите и споделуваа цитат од негово интервју кој гласи: „Здраво општество треба да има повеќе од еден глас“.
Две години подоцна, голем дел од лутината изчезна, и поради цензура, но и поради справувањето со корона-вирусот. Но профилот на д-р Ли на Weibo останува да биде потестник на раните денови од пандемијата и лутината. Неколку денови пред годишнината од неговата смрт, под неговата последна објава кога споделил дека е позитивен на вирусот се намножија рој од коментари во негова чест. Некои му посакаа да почива во мир пишувајќи му да не се грижи повеќе за пандемијата во Кина и дека Зимските олимписки игри во Пекинг се одвиваат добро. Некои пак му се обраќаат како на ангел чувар.
Неколкумина го цитираа писменото извинување дека полицијата го принудила д-р Ли да потпише откако бил укорен. Корисниците оставија повеќе од еден милион коментари под последната објава на д-р Ли во изминатите две години, иако не се знае колку од нив се избришани.
Превод: Фронтлајн
