Од 1 јануари до 10 февруари годинава, Секторот за внатрешни работи Скопје и Оперативниот тим – Потраги, во рамки на своите редовни активности на подрачјето на главниот град, лоцираа и приведоа 37 лица, кои биле барани со потерници, известуваат од МВР.
Лицата биле барани со потерници по различни основи: по наредби добиени од страна на Основен кривичен суд Скопје, Основно јавно обвинителство Скопје, Основно јавно обвинителство за гонење организиран криминал и корупција Скопје, КПУ Затвор Идризово, КПУ Затвор Скопје – Скопје и др.
Предмет на потрага беа лица за кои се распишувани локални, национални (централни) и меѓународни потерници: осудени лица со казна затвор, лица под истрага или со веќе определена мерка притвор, лица кои избегале од казнено-поправни установи.
Инаку, во текот на 2021 година на територијата на Скопје биле приведени 297 лица барани со потерница. Притоа, од страна на Оперативниот тим – потраги од слобода биле лишени 102 лица за издржување на вкупна казна затвор 269 години и 6 месеци и за доиздржување на преостанатиот дел од казната затвор во вкупно времетраење од 204 години и 11 месеци, пишува во соопштението.
Исто така од страна на организационите единици во рамки на СВР Скопје, во рамки на преземените оперативни активности од слобода биле лишени 195 лица за издржување на вкупна казна затвор од 210 години и 9 месеци и за доиздржување на преостанатиот дел од казната затвор во траење од 22 години, 11 месеци и 27 дена.
Воедно, во содејство на МВР Интерпол и МВР Потраги минатата година биле екстрадирани 32 лица, за кои беа распишани меѓународни потерници, потенцираат од МВР.
