Здружението на Украинците „Лесја Украинка“ заедно со дипломатите од Амбасадата во близина на споменикот на Тарас Шевченко во центарот на Скопје одржаа заедничка акција #StandWithUkraine. Главна цел на акцијата беше да се демонстрираат сплотеноста и единството на Украинците ширум светот, правото на Украина да ја избере сопствената иднина.
Претседателот на Здружението Олександар Урбанович изјави:
„Украина е во првите редови во одбраната на демократијата и слободата. Повикуваме на обединет фронт кој ќе се залага за заштита на заедничките европски вредности и ќе остане решен да му се спротивстави на агресорот. Дури и кога се наоѓаме во странство, Украина останува во нашите срца и ние сме заедно со нашата Татковина!“
Здружението „Лесја Украинка“ исто така испрати отворено писмо со апел до Владата на Република Северна Македонија со барање да и даде максимална поддршка на Украина во оваа праведна борба.
„Имајќи предвид дека Руската Федерација одамна презема чекори за уништување на евроатлантската безбедносна архитектура со брутално кршење на основните норми на меѓународното право, замолуваме да се преземат сите можни мерки за да се покаже единството на Северна Македонија со украинскиот народ и да се поддржи правото на избор на секоја нација да ја одбере сопствената иднина и да одлучува за сопствената судбина.“ – се вели во обраќањето претседателот на Здружението „Лесја Украинка“.
Настанот, исто така беше посветен и на одбележувањето на Денот на единството (16-ти Февруари).