Управата за јавни приходи (УЈП) веќе ги подготвила кривичните пријави за затајување на данок за Меѓународниот сојуз на првообвинетиот во „Рекет“, Бојан Јовановски (Боки 13) „БМЈ медиа груп“, која е сопственик на „1ТВ“ и против „Томато продукција“, јавува МЕТА.
Овие три правни субјекти директно или индиректно се поврзани со Јовановски.
„Пронајдовме фактури за ноќевања во хотели, авионски билети за лица кои не се вработени во „1ТВ“. Од страна на УЈП тоа е класифицирано како лично примање без пресметан персонален данок. Имаме и многу фактури за набавка на подароци (часовници и сл.) за кои ние пресметавме персонален данок. Во 2018 година исплатена е дивиденда на Јасна Мандиќ која не е сопственик на „1ТВ“ и тоа е противзаконски. Ние пресметавме и на тоа персонален данок“, информираа УЈП во октомври 2019 кога ги најави овие кривични пријави за затајување околу 325.000 евра данок.
