пишува: БОРЧЕ БОКИ ТРАЈКОВСКИ
Во секоја братоубиствена војна се јавуваат најмалку две страни кои ги полнат навивачките трибини, небаре станува збор за фудбалски натпревар, па едните извикуваат УРА за своите обележани со „Z“, другите два пати УРА за исто така своите обележани со „V“. И на трибините почнува да владее поделеноста. И едните и другите кои пренесуваат вести од фронтот каде „браќата“ пролеваат крв се индиректни соучесници во крвавиот чин. И за едните и за другите битно е да пренесат колку покрволочни се другите во однос на првите, се радуваат на поголемиот број загинати од другите, во однос на првите. Еве кои се Украинците, велат навивачите на Русите, од едната страна, прикажувајќи видеа и фотографии со фашистички знамиња, односно, со непрекинато ракетирање на цивилни објекти, од другата страна, и повредени и загинати деца. Се натпреваруваат со пролеаната крв. Изгубеност, забеганост, идиотизам. И кај едните и кај другите навивачи.
Најстрашниот момент е оној, кој, на агресорот, на напаѓачот му дава охрабрување и подршка за војната која ја предизвикал. Имал аргументи, погледнете го видеото, велат подржувачите на агресијата, видете и слушнете убаво што вели Путин какви му се оправдувањата за одлука да пролее братска и своја крв во обраќањето кон рускиот народ, разберете дека човекот не можел повеќе да чека, дека му се заканувала опасност од приближувањето на непријателски воени сили до неговата граница како директна закана кон руската нација и бришење на истите од картата на светот. Аргументи у пичку матер, да се најежиш. И воено дејствува, напаѓа немилосрдно од сите страни, ја пролева првата крв, и добива поддршка, замислете, за воениот напад врз братска независна држава за намерно и со умисла спроведената војна.
Другиве се принудени да се бранат со оружје, ама, не им личи бре, навивањето за тоа, кој повеќе убил во самоодбраната, кој повеќе крв пролеал, монтирани снимки од лажни паники, од лажни сцени за крвопролевање, за тоа кој е порасипан и понемилосрден во убивањето. Бљак.
И Путин и Зеленски знаат дека и после 30 години напади и одбрана, дури и после 50 години пролевање крв, ова ќе заврши со договор на маса. Ќе заврши со разговор. Тоа што нема брзо да се избрише, се трагите од пролеаната крв. И тука мора да се разбереме, воопшто не е важна мудроста за јајцето и кокошката. Тоа што ќе остане запишано, е.
Бог да бие кој прв почна…
