Министерот за економија Крешник Бектеши и министерот за енергетика на Бугарија Александар Николов денеска копретседаваа со Работната група за соработка во областа на инфраструктура, транспортот и енергетиката, помеѓу Северна Македонија и Бугарија.
На состанокот се разговараше за продлабочување на соработката помеѓу двете земји во делот на енергетиката и забрзување на реализацијата на енергетски проекти помеѓу двете земји. Главна тема на состанокот како што истакна министерот Бектеши на прес-конференција во Владата беа обезбедување на дополнителни количини на природен гас за Северна Македонија.
„Се разгледува можноста за резервирање капацитети за Северна Македонија во складиштата за природен гас кои се на територијата на Бугарија, за што на 6 или 7 април треба да се одржи состанок меѓу националните енергетски компании од двете земји „НЕР“ и „Булгаргаз“ за да се утврдат деталите и да се забрза процесот. Со менаџментот на енергетските компании разговаравме и за продолжување на интерконекторот Петрич – Струмица до ТЕЦ „Неготино“ преку ревидирање на постоечката студија. За интерконекторот Петрич – Струмица се договоривме да се ревидира студијата зашто претходната предвидела да имаме до Штип маркет тест, но тоа ќе го направиме до ТЕЦ „Неготино“ зашто преку ЕСМ се преземени соодветни мерки за да имаме дополнителен капацитет за производство на електрична енергија од природен гас. Тој интерконектор во иднина би можел да биде снабдувач на тој капацитет кој најверојатно ќе биде голем“, кажа министерот Бектеши и потенцираше дека како долгорочно решение во оваа насока е учеството на Северна Македонија во терминалот за течен гас Александропулос во Грција за што веќе е потпишан договор.
„Со менаџментите на енергетските компании од двете страни ги разгледавме можностите за забрзување на проектите имајќи ја предвид енергетската криза. И претходно имавме одлична соработка во енергетскиот сектор, но нема да застанеме тука. Ќе продолжиме со дополнителни проекти, за двете држави да имаат бенефит од инвестициите. Разговаравме за реализација на Меморандумот за поврзување на пазарите на Северна Македонија и Бугарија. При крај е постапката за воспоставување организиран пазар и компанија која тоа ќе го направи во земјава. До крајот на годината постапката треба да заврши, а во почетокот на годината кога ќе имаме организација на домашен пазар, ќе се поврземе со Бугарија, а тоа ќе го прошириме преку различни инвестиции, како што е интерконекторот со Бугарија и со другите соседи“, кажа министерот Бектеши на заедничката прес-конференција со министерот Николов.
Министерот за енергетика Александар Николов кажа дека Северна Македонија ќе биде снабдена со природен гас и ќе бидат обезбедени сите потребни количини преку Бугарија без разлика дали Бугарија ќе продолжи да се снабдува од Русија или не, од што зависи и снабдувањето за нашата земја, но истакна дека државите мора да инвестираат во обезбедување на алтернативни извори на овој енергенс.
„Северна Македонија и Бугарија се неразделно сврзани не само енергетски, инфраструктурно и историски, туку се и блиску до Европа. Војната во Украина е во наша близина и негативното влијание сите го чувствуваме. Сите мора да размислуваме за алтернативни начини кои ќе овозможат снабдување со природен гас, за да се минимизира зависноста од Русија. Неопходно е да се реализираат заеднички проекти за што бенефит ќе имаат граѓаните на двете земји. Во тешки времиња се гледа кои се вистинските пријатели. Има големи можности, но ризиците мора да се следат. Бугарија и е на располагање за помош на Северна Македонија, не само од технички аспект, туку и во делот на инфраструктурата“, кажа Николов.
