Граѓанската иницијатива „Охрид СОС“ вчера (29 мај) достави официјално барање за итна привремена заштита на куќа сместена на улицата „Димитар Влахов“ во Охрид. Барањето е адресирано до Министерството за култура и туризам (Секторот за заштита на културното наследство), Управата за заштита на културното наследство и Заводот за заштита на спомениците на културата и Музеј – Охрид, со апел веднаш да се запре понатамошното оштетување на овој објект.
Од „Охрид СОС“ посочуваат дека куќата се наоѓа во непосредна близина на старото градско јадро, односно во зона III-а согласно Планот за управување на светското природно и културно наследство на Охридскиот регион. Сметат дека е шокантно што овој исклучително вреден примерок од т.н. еклектична градска архитектура од периодот меѓу двете светски војни (изграден во 1927 година) досега не бил заштитен со закон.
Објектот, како што се наведува во барањето, содржи уникатни архитектонски обликовни и декоративни елементи кои се сочувани во многу мал број во Охрид и низ државата. Куќата исто така претставува дел од потенцијална заштитена амбиентална целина долж улиците „Димитар Влахов“ и „Даме Груев“ во центарот на градот.
Што предвидува Планот за управување со Охридскиот Регион?
Од иницијативата потсетуваат дека актуелниот План за управување (2020-2029) за оваа конкретна зона предвидува мерки на урбана реконструкција со задолжително почитување на амбиенталните карактеристики на целината, традиционалните форми и хармонијата на просторот. Планот строго забранува окрупнување на градежни парцели со цел да се превенира изградбата на габаритни објекти кои би ја нарушиле визуелната перцепција кон Старото градско јадро.
Дополнително, оваа куќа се наоѓа во непосредна близина на неколку значајни јавни објекти од здравството, социјалната заштита и образованието, со кои сочинува веќе оформена архитектонско-урбанистичка целина. Меѓу нив се Маларичната амбуланта, Пензионерскиот дом (дело на проф. Живко Поповски), градинката „Тина Ристеска“, Гимназијата „Св. Климент Охридски“ и ООУ „Григор Прличев“.
Барање за итно решение од надлежните**
„Охрид СОС“ инсистира надлежните институции веднаш да донесат Решение за привремена заштита согласно член 39 од Законот за заштита на културното наследство. По донесувањето на ова решение, објектот би подлежел на соодветна постапка на валоризација за да се осигура неговото сочувување за следните генерации како дел од Исклучителните универзални вредности на Охридскиот Регион заштитени од УНЕСКО.
