Според податоците на Државниот завод за статистика во декември 2021 година на ниво на држава се издадени 378 одобренија за градење, што е за 23.9 % повеќе во однос на истиот месец од претходната година. Предвидената вредност на објектите изнесува 3.837.810 илјади денари, што е за 3.0 % повеќе во однос на истиот месец од претходната година.
При крајот на 2021-ва година на Охрид му се издадени 11 дозволи за градење на згради.
„Во Охрид во декември минатата година биле издадени 11 одобренија за градби, од кои 10 на физички лица и 1 на деловен субјект. Предвидена е изградба на 8 станови со површина од 891 м2, од кои 2 двособни, 3 четорособни и 3 петособни“, велат податоците од ДСЗ.
Од вкупниот број издадени одобренија за градење, на ниво на држава 228 (60.3 %) се наменети за објекти од високоградба, 42 (11.1 %) за објекти од нискоградба и 108 (28.6 %) за објекти за реконструкција.
Но локацијата на градбите е проблематична за дел од жителите на Охрид. Новите згради што се градат во централното градско подрачје предизвикуваат немир и тревога кај граѓаните, што од безбедносни но и од приватни причини.
Екипата на Фронтлајн, имаше можност да поразговара со еден од староседелците на булеварот „Турситичка“ до населбата Бејбунар до чија зграда, веднаш се гради нова зграда.
“Јас сум тука скоро целиот мој живот, можете да забележите колку сум стар – вакво нешто до сега немало. Неколку години наназад протестиравме за зградата која што се изгради позади и се залепи до старите згради, но немаше никаква можност да се спречи таа града – бидејќи земјиштето веќе било продадено. Сега две години подоцна, повторно исто. Ова земјиште што го гледате е приватна сопственост – точно, но во далечното минато истото е исплатено и луѓето се обештетени – сега повторно истите ги обжалуваат жалбите, државното земјиште го враќаат на општината, општината на нив и потоа тоа се продава на инвеститори. Реално, нема никаква правна отстапка и нормално дека ќе се добие на секој суд – но, прашањето на нас постарите ни е, кој ќе остане да живее тука кога ќе си се гледаме во прозори едни со други? За наше добро и за доброто на градот, треба да се намали со градба. Луѓето сакаат финансии и тоа е нормално, квадрат во Охрид скокна до 1200евра, но не по цена на мирен живот”, вели Охриѓанецот со мака и желба за зачувување на својот град.
Во 2019 година Охриѓани се соочија со истиот проблем, на локација слична до денешната, тие протестираа против изградба на зграда. Три години подоцна, зградата е веќе направена, а правно не може никако да се реагира, бидејќи имотите се приватни и се продадени на инвеститор, нешто што се случува и сега.
Но проблемот на градежната експанзија не е само овој регион, туку се гради низ цел Охрид, особено во делот на Градската болница.
Екипата на Фронтлајн стапи во контакт и со сопственик на станови веќе изградени, но и во изградба. Цените се движат од 1.390 евра за метар квадратен, но шокантно е она што се очекува таа цена да нарасне од 1.550 евра, до 1.850 евра за метар квадратен.
И Охридското крајбрежје е исто така мета на инвеститорите, и тука на големо се градат згради и се реставрираат постари објекти.
Сопственикот на станови со кого разговаравме, на прашањето дали и покрај економската криза сè уште има побарувачка на станови, одговори дека побарувачка има и истата ќе продолжи да расте, па кој си купил, ќе си има стан.
Охрид полека, но сигурно станува жариште на цементот, додека статусот на УНЕСКО виси на конец. Северна Македонија и Албанија како држави што управуваат со Охридскиот регион како светско културно-историско и природно богатство имаа обврска до 1 февруари оваа година до УНЕСКО да достават извештај со реализиран напредок во спроведувањето на активностите посочени во препораките за заштита на Охридскиот регион.
М. Миткоска и В. Крстевски