Министерството за образование и наука и УНДП креираа стратешки документ со конкретни насоки за тоа како понатаму да се развиваат Регионалните центри за стручно образование и обука, кои треба да бидат водечки образовни установи за стручна подготовка на граѓаните, како на помладите, така и на повозрасните во разни области со што ќе се подигнува нивната вработливост и ќе се намалува невработеноста како клучен приоритет и услов за напредок на секоја економија, информираат од Министеството за образование и наука.
Ова го истакна министерот за образование и наука Јетон Шаќири на денешната прес конференција со Армен Григорјан, постојаниот претставник на УНДП во Северна Македонија на која беше презентиран развоен Концепт за регионални центри за стручно образование и обука, кој треба да помогне во унапредување на нивната работа и со тоа и во модернизација на системот на стручно образование и обука во државата.
„Од неодамна во земјава функционираат три регионални центри за стручно образование и обука кои се формираа преку трансформација на средните стручни училишта:„Моша Пијаде“ во Тетово, „Ванчо Питошески“ во Охрид и „Киро Бурназ“ во Куманово. Но, паралелно со основањето на овие образовни установи, се работеше и на концепт, односно патоказ за нивно долгорочно градење и развој и така го создадовме овој документ кој предвидува сé што низ еден координиран пристап на повеќе институции и засегнати страни ќе треба се направи за да имаме модерни, ефикасни и ефективни образовни установи за стручно образование и обука кои ќе ја постигнуваат целта заради која и постојат“, рече Шаќири.
Министерот информираше дека иницијативата е на МОН, но без поддршка од УНДП, ЕУ и низа други партнери, истата немаше да се реализира.
Рече дека регионалните центри за стручно образование и обука нудат осум различни квалификации и се составен дел и од новиот конкурс за упис во средно образование во учебната 2022-2023 што е веќе објавен. Освен за средношколци, дополнително центрите нудат и можности за повозрасните граѓани за доквалификација и преквалификација со цел пронаоѓање на своето место на пазарот на трудот.
„Сакаме регионалните центри за стручно образование и обука да добијат нова улога, односно да обезбедат претприемнички и други клучни компетенции за доживотно учење. Тие треба да прераснат во лидери за инклузивност, иновативност и релевантност согласно побарувачката на пазарот на труд“, додаде министерот Шаќири.
Досегашното искуство во воспоставувањето на оваа значајна реформа, како што нагласи министерот, ќе биде основа за работа на новиот Закон за стручно образование и обука каде се предвидува поддршка за дуалното образование и Регионалните центри за стручно образование и обука.
Постојаниот претставник на УНДП во државата, Армен Григорјан потенцираше дека регионалните центри за стручно образование и обука се предвидени во Стратегијата за образование 2018-2025 како стратешка определба на Владата и Министерството за образование и наука.
„Се очекува дека формирањето на овие регионални центри за стручно образование и обука ќе се подобри и ефикаснота на реформите на стручното образование и обука преку централизацијата на инвестициите, но и со промоција на иновациите во стручното образование и обука базирани на добри меѓународни практики“, заклучи Григорјан./МИА/
