Менаџерот Роберт Голоб и неговата партија Движење за слобода се убедливи победници на вчерашните парламентарни избори во Словенија и ќе можат брзо да формираат нова влада со само уште една или две партии, покажуваат официјалните резултати по пребројани над 99,7 отсто од гласовите.
Прaтеници во новиот состав на 90-члениот Државен зборе (парламент), каде 88 се бираат од листите на политичките партии и двајца од две национални малцинства, добија само пет партии кои го поминаа прагот од 4 отсто.
Партијата на Голоб освои 35,54 отсто од гласовите и 41 пратеничко место, што досега никому не му успеало во историјата на словенечката демократија, а претставува одраз на групирањето на левичарски гласачи кои се спротивставија на десничарската влада на Јанез Јанша и „тактичкото“ гласање на на бирачите на помалите партии од левиот центар.
Втор најголем број гласови на вчерашните избори го доби Словенечката демократска партија (СДС), на поранешниот премиер Јанез Јанша, кој веќе го призна поразот.
Неговата партија освои 23,53 отсто од гласовите и 27 пратенички места, едно повеќе отколку на изборите во 2018 година.
На трето место според изборните резултати е демохристијанската Нова Словенија (НСИ), која беше член на досегашната влада на Јанша, а чиј претседател Матеј Тонин најави дека во иднина ќе претставува конструктивна опозиција.
Социјалдемократите (СД), предводени од Тања Фајон со 6,65 отсто од гласовите, нешто послаб резултат од пред четири години, освоија седум места и најверојатно ќе бидат главниот партнер на Голоб во новата влада. Согласно политичката традиција се очекува Голоб да биде поддржан и двајца претставници на малцинствата од унгарската и италијанската заедница.
Партијата Левица (Л), предводена од Лука Месец, освои пет пратенички места со 4,38 отсто од гласовите, нешто помалку од очекуваното според изборните анкети.
Со неа во владата Голоб добива уште поубедливо мнозинство, но има мислења на некои аналитичари дека би можел да ги избегне доколку реши да формира „влада на национално единство“ со оглед на можното влошување на општествената ситуација доколку продолжи кризата во Европа поради војната во Украина и наместо Левица – во владата да ја вклучи Нова Словенија.
Голоб, 55-годишен менаџер и релативно ново лице во словенечката политика, синоќа, при поздравувањето на своите членови рече дека партијата ја постигнала својата цел и величествениот изборен резултат и дека сака да формира нова влада што е можно поскоро.
„Сите вие сте заслужни за слободата што утре ќе дојде во Словенија“, рече Голоб во пораката до членовите на неговиот изборен штаб, говорејќи преку зум од неговиот дом, каде што е изолиран од почетокот на неделата поради инфекција со коронавирус.
Тој особено се заблагодари за поддршката од граѓанските организации и младите, која, како што рече, го инспирирала и најави дека подобрувањето на условите за живот на помладите генерации ќе биде еден од приоритетите на неговата идна влада, која сака да ја формира што поскоро.
Тој е особено воодушевен од високата излезност на изборите, која според неофицијални податоци е околу 65 отсто, а тоа на идната влада и дава посебен легитимитет и одговорност да го исполни ветеното во партиската програма.
На второ место е Словенечката демократска партија (СДС) на актуелниот премиер Јанез Јанша, која има 24,5 отсто од гласовите, односно 29 пратенички места.
Според изборните резултати демохристијанската Нова Словенија (НСИ), ќе има осум пратенички места, Социјалдемократите (СД) седум и Левицата (Л) четири. /МИА/.
