Министерката за труд и социјална политика, Јованка Тренчевска отпатува за Рим, Италија каде ќе учествува на дводневна Министерска конференција за стареење, во организација на УНЕЦЕ, Постојаната работна група за стареење на УНЕЦЕ и Владата на Италија.
-Со годинешната конференција се одбележуваат две децении од усвојувањето на Мадридскиот акциски план за стареење и регионалната стратегија за имплементација. Темата на Конференцијата е „Здружување на силите за солидарност и еднакви можности во текот на целиот живот“. Овие теми ќе бидат адресирани преку перспективи за промоција на активно и здраво стареење во текот на целиот живот, обезбедување пристап до долготрајна нега и поддршка за негувателите и семејствата, мејнстриминг на стареењето за напредок на општеството за сите возрасти, се вели во соопштението од МТСП.
Министерката Тренчевска ќе учествува како панелист на сесијата организирана од Владата на Бугарија и Регионалната канцеларија на Фондот за население на ОН (УНФПА) денеска на тема „Зајакнување на демографската отпортност преку искористување на можностите од стареењето на населението“.
За време на посетата на Рим и во рамки на министерската конференција, планирана е средба меѓу министерката Тренчевска и Директорката на Регионалната канцеларија на Фондот за население на ОН (УНФПА), Џулија Валезе и билетерална средба со министерката за семејство и социјална заштита на Република Турција, Дерја Јаник.
