Градоначалникот на Скопје Петре Шилегов денеска најави дека во понеделник ќе биде објавен конкурс за идејно решение за изработка на нов парк во населбата Карпош 4, што ќе трае два месеца, а најдобите решенија ќе бидат наградени со награден фонд до 10.000 евра.
– Станува збор за површина од 60.000 метри квадратни, предел кој што во моментов е непристапен, небезбеден и на којшто има дива депонија што претставува жариште за загадувањето, меѓутоа и место каде што често се палат огнови на отворено, нагласи Шилегов.
Тој посочи дека во меѓувреме градските претпријатија почнале со отстранување на шутот и отпадот од депонијата и со расчистување на површината.
– На овој простор ќе бидат поставени содржини за спорт и рекреација, а ќе биде предвиден простор и за ботаничка градина за која исто така разговаравме со граѓаните во текот на кампањата. Дополнително планирано е и изградба на сервисна улица и два моста, рече градоначалникот на Град Скопје.
Тој нагласи дека непристапните и небезбедни површини, што се диви депонии и диви паркиралишта, ги уредуваат и ги отвораат за сите граѓани.
– Една по една неуредените јавни површини ги претвораме во паркови. Подигнуваме нови зелени површини за скопјани. На овој начин вложуваме во подобра животна околина, но во подобрување на квалитетот на амбиенталниот воздух, потенцираше Шилегов.
На заедничката прес-конференција, градоначалникот на Општина Карпош рече дека постојано работат на зголемување на зеленилото во градот и го радува помислата дека на тој потег ќе никне огромен парк.
