Заменик министерот за правда Агим Нухиу присуствуваше на Министерскиот форум ЕУ-Западен Балкан за внатрешни работи и за правда кој се одржа во Тирана.
Во своето обраќање Нухиу се осврна на владеењето на правото како една од основните вредности на кои се темели Европската Унија и посветеноста на Министерството за правда за реформите во правосудниот систем. ,,Воведувањето и зајакнувањето на мерливи критериуми за избор и унапредување за судиите и јавните обвинители, односно за членовите на Судскиот совет и Советот на јавни обвинители дадоа резултати во насока на зајакнување на квалитетот во судовите и јавните обвинителства. Дополнително, донесените нови законски и подзаконски акти овозможија реално оценување и евалуација на работата на судиите, преку оценување на сложеноста на предметите по кои постапувале и други параметри, со што квалитот беше подигнат на повисоко ниво во однос на квантитетот”,рече Нухиу.
Нухиу се осврна и на Стратегијата за реформа на правосудниот сектор за 2017-2022 година со Акциски план 2017-2022 како и на Предлог -законот за Академијата за судии и јавни обвинители кој се наоѓа во собраниска процедура.
.,,Во оваа пригода би сакал да ги потенцирам активностите за изготвување на новиот Кривичен законик. За ова имаме широка поддршка од меѓународните организации, а посебно од ОБСЕ. Клучните прашања кои се разгледуваат во рамките на новиот Кривичен законик се поврзани со имплементацијата на најновите меѓународни стандарди во оваа област и тоа посебно во областите на тероризмот, финансиските измами и имплементацијата на стандардите содржани во Истанбулската конвенција”,посочи Нухиу на Министерскиот форум во Тирана.
На маргините на форумот, заменик министерот за правда Агим Нухиу оствари билатерална средба со Комесарот за судство и борба против корупција,Дидие Рејндерс.
