Во северниот дел на Косовска Митровица денеска околу пладне започна собир во знак на протест поради постапките на Приштина. Учесниците на митингот носат голем број српски знамиња.
Предвидени се повеќе обраќања, кои почнаа со говорот на ректорот на Универзитетот во Приштина, преместен во Косовска Митровица, проф. д-р Небојша Арсиќ, кој рече дека се собрале со желба нивните деца да имаат живот во мир, како и да кажат „НЕ на кршењето на основните права на Србите“.
Не се согласуваме да бидеме граѓани од втор ред. Универзитетот отсекогаш ја делел судбината на нашиот народ, истакна Арсиќ и ги повика насобраните да не наседнуваат на евентуални провокации и да се однесуваат „со трезвена глава“.
Директорот на Клиничката болница во Косовска Митровица, Златан Елек изјави дека Приштина спроведува терор врз Србите, наведувајќи дека косовските Срби имаат доверба во својата држава Србија и во претседателот Александар Вучиќ.
Тој нагласи дека Приштина се обидува да ги протера Србите од тие области, но дека нема да успеат, наведувајќи дека здравството отсекогаш било столб на опстанокот на српскиот народ.
