Министерот за транспорт и врски Благој Бочварски на денешниот панел за Кластерот 4 најави инвестиција од над една милијарда евра во железничката мрежа.
„Финализирањето на патниот и железничкиот Коридор 8 е предизвик и нешто на кое сме силно фокусирани во овој период. Нашата цел е со регионалните партнери, Бугарија, Албанија и Италија овој Коридор да го позиционираме во единствениот Коридор на Западен Балкан. Поради тоа планираме инвестиција од преку една милијарда евра само во железничката мрежа, рече министерот Бочварски и појасни дека токму ова била и темата на која пред два дена во Брисел разговарал со еврокомесарката за транспорт и побарале поддршка од европските фондови.
-На Коридорот 10 работиме на постапките за воведување интелигентен транспортен систем (ИТС) кој подразбира имплементација на мерки за поголема безбедност и информации за возачите во реално време. Во 2023 година е предвидена тендерска постапка и имплементација на ИТС, рече министерот.
Бочварски рече дека се најавении и измени во Законот за градење со кои ќе се поедностави постапката за поставување фотоволтаици, како за физичките така и за правните лица.
-КОВИД пандемијата не натера да делуваме регионално и Северна Македонија во тој дел беше првата земја што воспостави „зелени коридори“ со држава членка на ЕУ, за брз и навремен транспорт на стоките и услугите, рече министерот Бочварски.
Извор: Бриф
