Армискиот полковник Ивица Ампов ќе биде првиот воен претставник на Република Северна Македонија во НАТО, дознава НОВА од свои извори.
Назначувањето доаѓа безмалку по три години членство во Алијансата на Македонија, откако претходно пропадна едно назначување поради недобивање на НАТО сертификат на полковникот кој од Министерството за одбрана и државното раководство беше избран да ја врши оваа висока и престижна функција.
За Ампов се завршени сите процедури, вклучително и потребниот НАТО сертификат, а указот веќе е потпишан од страна на Пендаровски и е објавен во Службен весник.
Ампов претходно беше воен аташе на Македонија во САД, наследувајќи го на таа функција генералот Методи Хаџи-Јанев. Во моментов Ампов е раководител на военото разузнавање, каде го замени полковникот Горан Василевски кој замина на едно од местата кои Македонија ги доби во ОБСЕ во Виена.
Министерката за одбрана Славјанка Петровска, синоќа во интервјуто за Вин-Вин на Телма потврди дека е извршен избор на воен претставник во НАТО и дека тој ќе замине на функцијата на почетокот на јануари, но не го кажа името на воениот претставник.
„Процедурата е завршена, согласно процедурата претседателот го потпиша указот за назначување на нашиот воен претставник, објавен е во Службен весник, формалните подготовки се веќе завршени така што на почетокот тој ќе замине во Брисел и ќе ја преземе должноста на висок воен претставник, официјално прв воен претставник. Станува збор за полковник кој досега ја извршуваше позицијата раководител на Секторот за безбедност и воено разузнавање во Министерството за одбрана, искусен, долги години во Армијата, две години наш воен аташе во САД, поседува степен на НАТО сертификат, професионалец, човек кој си ја сака државата и ќе работи исклучиво во интерес на државата“.
С.К.
Извор: НоваТв
