По неколку дена откако турската компанија Бин-Бин постави електрични тротинети низ Скопје, три од нив се веќе украдени, според последните информации од МВР.
Порпаролот на Министерството за внатрешни работи Тони Ангеловски вели дека досега се пријавени три кражби на ова алтернативно превозно средство.
На социјалните мрежи изминатите денови имаше реакции дека веќе голем дел од тротинетите се оштетени, но и критики на адреса на турската компанија за интеракцијата со клиентите.
Снимки на кои се гледа како деца на возраст од 13-14 години ги кршат електричните тротинети кои од неодамна можат да се изнајмат во Скопје, објави телевизијата „Канал 5“.
Непримерното однесување и уништувањето на тротинетите започна во првиот момент кога тие станаа достапни за скопјани, замислени како еколошко и практично средство за градски превоз.
Покрај уништувањето и вандализмот, граѓаните деновиве реагираа и за оставањето на тротинетите расфрлани насекаде – од велосипедски патеки и пешачки премини, до градилишта и приватни дворови.
Семејство од Скопје доживеало голгота затоа што после плаќањето на користењето електричен тротинет, апликацијата продолжила да им зема од сметката средства иако според инструкциите го прекинале користењето на услугата, објави Телма.
Родител се пожали дека системот поради „багови“ во софтверот кој најверојатно не бил тестиран или не било забележано дека има аномалии при тестирањето, продолжува да наплаќа од сумата.
За нивна среќа, во кол-центарот кој работи на англиски и на турски јазик, службеник го решил проблемот во 4 наутро. Таткото на девојката која го користела електричниот тротинет објави дека треба да се внимава затоа што можно е апликацијата од картичка да ги извлече сите средства, а пресметките велат дека за 24 часа тоа се 13.000 денари.
Скопјанец со уште едно горко искуство откако решил да се повози со тротинетите кои од минатата недела им се на располагање на граѓаните за изнајмување. Тој сподели дека поради апликацијата морал да плати 360 денари за возење од Централен регистер до Железничка.
Телефонската поддршка не беше достапна (работи само до 23-00 часот). Го оставив без да го исклучам, немаше друга опција. Ми зарачунаа околу 360 денари дека сум им должен. 360 денари од Централен регистер до Железничка. За тротовите што ги фрлиле во река или контењер не жалете, осигурани се 100%. Уште една шема за финансиско касапење на недолжна клиентела… заклучува овој скопјанец во својата објава.
