Претседателот на Владата на Република Северна Македонија, Димитар Ковачевски, заедно со првиот заменик на претседателот на Владата и министер за политички систем и односи меѓу заедниците, Артан Груби, присуствувал и се обратил на настан по повод одбележување на 22 години од потпишувањето на Охридскиот рамковен договор.
На настанот, соопштија денеска од владината прес-служба, премиерот Ковачевски и првиот вицепремиер Груби им доделиле сертификати на учесниците за успешно завршување на Школата за млади лидери „Peace forum dialogue”, на тема „Интеграција преку помирување“ во организација на Министерството за политички систем и односи меѓу заедниците.
– Оваа година одбележуваме 22 години од потпишувањето на Охридскиот рамковен договор, кога нашата држава отвори ново поглавје од својата понова историја во духот на мирот, добрососедството и взаемната почит. Од држава која пред повеќе од две децении се соочуваше со можноста од разлевање на конфликтот, прераснавме во симбол на мултиетничноста, мултиконфесионалноста и мултикултурализмот. Охридскиот Рамковен договор го замени говорот на оружјето на терен со говорот на разумот на маса, ги институционализираше отворените прашања и испрати порака дека проблемите не се решаваат со конфликт, туку преку дијалог и дебата. И дека, како што вели самиот договор, не постојат територијални решенија за етничките прашања, нагласил премиерот Ковачевски.
Денес, од оваа временска дистанца, истакнал Ковачевски, сакам да истакнам еден непобитен факт – а тоа е дека Охридскиот Рамковен договор го донесе мирот и постави цврста рамка за меѓуетнички односи, пред сè соживот, заштитувајќи го територијалниот интегритет и суверенитет.
– Сите заедно, со почит кон другиот, со взаемна грижа и посветеност да си помагаме едни на други, а така и да ја градиме нашата држава, потенцирал премиерот Ковачевски.
При тоа, тој нагласил дека како држава, нашите стремежи за унапредување на правата на заедниците ги исполнивме преку создавање на Секретаријат за спроведување на Охридскиот рамковен договор, кој прерасна во Министерство за политички систем и односи меѓу заедниците.
Премиерот, во своето обраќање го потенцирал значењето на Школата за млади лидери, која веќе втора година по ред ја организира Министерството за политички систем и односи меѓу заедниците.
– Република Северна Македонија извлече поука од минатото. Извлековме поука дека предизвиците нѐ прават посилни и нѐ поттикнуваат да одиме напред бидејќи во заедништвото е силата. Предолго чекавме на нашата шанса да станеме дел од ЕУ за да можеме така лесно да ја испуштиме можноста за подобар и поквалитетен живот за сите нас. Свесен сум за предизвиците кои ни претстојат, но се надевам и на свесност и кај другите носители на процесите дека нашата држава заслужува подобро утре и тоа сега. Граѓаните од нас очекуваат да продолжиме храбро напред, сите заедно и сите како едно да ги оствариме нашите децениски заложби како граѓани на европска Република Северна Македонија, заклучил премиерот Ковачевски во своето обраќање по повод 22-годишнината од потпишувањето на Охридскиот рамковен договор.
Првиот Заменик на Претседателот на Владата и министер за политички систем и односи меѓу заедниците, Артан Груби, се наведува во соопштението од владината прес-служба, на настанот потенцирал декa eдна од најглавните точки на второто издание на „Peace Forum Dialogue“ e наставата и предавањето за вистинските вредности на политиките на соработка, европските и проамериканските политики, како загарантиран успех за подобра иднина.
– Зошто да се третира Охридскиот договор? Во периодот од неговото потпишување до денес, имаме нова генерација која навистина веројатно не знае многу за овој договор, за државата пред неколку години и за достигнувањата кои се постигнати преку овој договор. Оваа генерација на 22-годишници, но уште повозрасни, треба да се информира за овој историски мирен процес, се посочува во соопштението.
„Peace Forum Dialogue“ како и „Peace Festival“, навел Груби, ги пренесуваат соодветните вредности на демократијата, за да не се повторат грешките од минатото.
– Тие даваат пораки за мир и толеранција за подобра иднина, подвлекол првиот вицепремиер Груби, додавајќи дека преку овие активности на учесниците и граѓаните им се става до знаење дека како што нашата земја стана полноправна членка на НАТО, така и ќе чекори на патот кон ЕУ.
