„Новиот Закон за употреба на македонскиот јазик е од огромно значење за зачувување и унапредување на нашиот јазик и културно наследство, затоа очекувам од сите да биде едногласно поддржан. Ја проширува задолжителната употреба на македонскиот стандарден јазик и неговото кирилско писмо на поширок опсег на области“ рече министерката за култура, Бисера Костадиновска-Стојчевска во интервју за весникот „Вечер“.
Таа додаде дека една од најголемите придобивки на овој нормативен акт е задолжителното вработување на лектори во законодавните, извршните, судските власти, единиците на локалната самоуправа, ќе се лекторираат официјалните документи и текстовите на јавните установи и институции во културата, образованието и науката, во медиумите.
„Грижата за македонскиот јазик, унапредувањето на неговата примена се започнува од најрана возраст затоа секој вид јавна комуникација со правилно користење на јазикот е приоритет на новиот закон. Меѓународните договори ратификувани во согласност со нашиот Устав, исто така, ќе подлежат на лекторирање, заедно со публикации, учебници, магистерски и докторски трудови и преводи на македонски јазик. Дополнително, ќе бидат вклучени физички рекламни материјали, имиња на производи, пакување, упатства… Овој закон ја дава основата за усвојување на Национална стратегија за македонскиот јазик, што ни овозможува дополнително да го чуваме неговиот интегритет“ рече Костадиновска-Стојчевска.
Министерката исто така истакна дека Министерството за образование и наука ќе нуди стипендии за јазични студии, а професионалните лектори ќе бидат лиценцирани.
„Преку засилен инспекциски надзор, имаме цел да поттикнеме правилна употреба на јазикот во сите сфери, осигурувајќи се дека се зачувани уникатните квалитети на нашиот јазик. Јазикот е нашиот идентитет, а оваа законска рамка значително придонесува за зачувување на нашето културно наследство и државност“ потенцираше Костадиновска-Стојчевска.
