пишува: БИЉАНА ЈОРДАНОВСКА
Најголемиот број на веб страници, печатени медиуми, радио или телевизии, кога зборуваат за ФЕМИНА обично ги побрзуваат типичните женски теми и муабети, проблеми и решенија, љубовта и сексот, женското пријателство и здравје, хороскопот и како најдобро да заведете маж, да растете деца, да бидете, другарка, дама, мајка, љубовница, кариеристка, модерна или конзервативна. Сè она што е ин, бренд и кореспондира со брзиот и модерен начин на живеење во 21 век.
Сепак, истите тие медиуми не ретко ќе исфрлат тема која иницира прашања поврзани со феминизмот или родовите прашања. Со ретки исклучоци на специјализирани страници посветени на феминизмот, помалку или повеќе, ставањето на жената во првата, фронтална, линија на борбата против стереотипите и клишеата е секогаш во сивата зона на незнаењето, неприфаќањето и, пред сè, негирањето на женските права. Феминизмот добива негативна конотација и наместо да руши бариери, крева ѕидови преку креирање митови. Опасни и деструктивни.
Затоа, ФЕМИНА на FRONTLINE.MK ќе биде место во кое ќе се рушат предрасудите, маскулинистичката доминација, дискримнацијата, декларативното (лажно) признание на правата на жената во светот, а ќе се градат конструктивни дијалози и простори за борба за родовата еднаквост и права да се биде, пред сè, Човек.
Феминизмот по дефиниција е збир од идеологии за подобрување и изедначување на социјалниот, политичкиот и економскиот статус на жената во општеството кој започнува уште во 19 век како една од последиците на индустриската револуција. Во модерната терминологија феминизмот евалуира во „теорија на политичката, економската и социјалната еднаквост на половите“ и „организирани активности во име на женските права и интереси“.
Затоа, независно на вашата родова, сексуална, социјална, политичка или образовна и било каква припадност, добредојдовте на ФЕМИНА!
Discussion about this post