Реконструкцијата на оваа улица е дел од „Проектот за поврзување со локални улици и патишта”, кој се реализира преку Министерството за транспорт и врски и преку кој се дава директна поддршка на локалните самоуправи во вкупна вредност од 70 милиони евра за реконструкција на локални улици и патишта во општините.
„Започнавме со реконструкција на оваа улица, каде, на мое големо задоволство, гледаме дека работите на терен се интензивираат. Со забрзано темпо се продолжува со поставување на нов слој на асфалт на улицата, каде се изведува нова пешачка и велосипедска патека во должина од 2 километри. Со оваа динамика, очекуваме зафатот да заврши во предвидениот рок. Со рехабилитација на оваа улица го подигнуваме нивото на безбедноста за сообраќај и овозможуваме побрза комуникација со жителите од Прилепскиот Регион“, рече претседателот на Владата на Република Северна Македонија, Димитар Ковачевски, при денешниот увид на реконструкцијата на улицата „Леце Котески“ во Прилеп.
При тоа, премиерот Ковачевски додаде дека за реализација на овој проект се обезбедени близу 800 илјади евра.
„Реконструкцијата на улицата „Леце Котески“ е дел од проектот „Поврзување со локални патишта во општините” за што се инвестирани 70 милиони евра, а досега се опфатени преку 140 улици во над 60 општини. Инвестираме насекаде низ целата држава, се грижиме за рамномерен регионален развој. Ги подобруваме условите за живот во општините, ја зголемуваме нивната финансиска независност. Бидејќи развиени општини значат силна економија.“ – потенцираше премиерот Ковачевски.
Министерот Бочварски потенцираше дека динамиката на изградба е според планот на Изведувачот. До сега се асфалтирани 800 метри од вкупно 2.000 метри. Во наредните две недели, цела должина ќе биде асфалтирана со прв слој на асфалт со што понатаму продолжуваат градежните активности за изградба на тротоарите и велосипедската патека. Оваа инвестиција е дел од вкупниот инвестициски циклус за Прилеп и Пелагонија во изградба и модернизација на патната мрежа.
„Владата, преку Министерството за транспорт и врски продолжува силно да ги поддржува локалните самоуправи, обезбедувајќи им неповратни средства за реализација на голем број проекти во патната инфраструктура кои носат значаен бенефит за сите граѓани. За реконструкцијата на улица „Леце Котески“ вложуваме близу 50 милиони денари, а ова е втора улица која ја реконструираме во Прилеп по улицата „Мице Козар“, чија реконструкција е веќе завршена. Тука на дел од улицата веќе е поставен прв слој на асфалт, а во овој момент се врши тампонирање и припрема за асфалтирање и на останатиот дел од трасата, како и на тампонирање на тротоарските површини. прилепчани да бидат уверени, добиваат најбезбедна и модерна патна врска во градот“ – истакна министерот за транспорт и врски, Благој Бочварски.
Министерот Бочварски исто така информираше дека на владина седница е одобрен првиот инфраструктурен проект во должина до 29 километри за изградба на автопатот Прилеп – Битола.
