ЦИВИЛ и Општина Гостивар на 18 декември одржаа мултимедијален настан „Заедно за подобра иднина“ во Гостивар.
Ученици од осум основни училишта во општината учествуваа на конкурсот со избор од креативни ликовни творби, кои беа изложени во просториите на општина Гостивар. Со одлука на комисијата за оценување, градоначалникот Арбен Таравари додели награди на најуспешните учесници, а ЦИВИЛ додели сертификати за учество на сите што беа дел од овие активности.
На настанот пред публиката од граѓани, ученици и наставници, се обратија градоначалникот на Гостивар, др. Арбен Таравари и претседателот на ЦИВИЛ , Џабир Дерала.
„Посебно задоволство и чест што реализираме успешно уште еден проект со ЦИВИЛ. Би сакал да им се заблагодарам што во повеќето проекти што се реализирани со општините, општина Гостивар била вклучена, и посебна чест за нас е што завршуваме уште еден проект успешно. Се работи за осум училишта од Гостивар, каде што нашите ученици направија слики на тема „Заедно за подобра иднина“.
Се надевам дека нашите заеднички проекти ќе продолжат и понатаму, и повторно ќе ги завршиме успешно, со една цел, да ги мотивираме нашите млади луѓе, деца од нашата општина, да размислуваат за подобра иднина“, изјави Таравари.
„Драги деца, во името на ЦИВИЛ, ви благодарам што зедовте учество во овој конкурс, во овој натпревар, за подобро утре, за подобра иднина, заедно, и секако дека вашите пораки овде, вашите визуелни пораки, ќе прошетаат низ целата земја, и низ целиот свет.За тоа ќе се погрижиме со моите колешки и колеги од ЦИВИЛ.
Би сакал да кажам уште нешто за нашата соработка со овој град. Пред се со градоначалникот на општината, др. Таравари, кој буквално за секоја иницијатива, што ја има градот Гостивар, не кани да бидеме присутни, да бидеме дел од вашите активности како граѓанки и граѓани, како најмлади, и исто така, секогаш кога ние имаме некоја идеја или иницијатива, на ниво на повеќе општини, Гостивар е првата општина што одговара позитивно и целосно на сите наши идеи, со дополнителни, нови идеи.
Доктор Таравари е човек кој навистина широко ги сфаќа работите, има длабоко разбирање за сите работи, за кои ние сме загрижени, или пак имаме некакви надежи.
И заради тоа му благодарам и во оваа прилика, и сметам дека со интелектуалци, пред се, а не само политичари, туку интелектуалци и политичари, како што е др. Таравари, ние имаме некаква перспектива која ќе им даде можност на младите генерации да одат напред“, изјави Дерала.
Настанот е дел од проектот „Заедно за подобра иднина“, чија цел е промоција на мултикултурализмот и европските вредности во земјата, со посебен фокус на младите.
Проектот „Заедно за подобра иднина“ ЦИВИЛ го спроведува со поддршка од Министерството за надворешни работи и европски прашања на Големото Војводство Луксембург.
Д. Тахири
Камера: Дехран Муратов
Монтажа: Ариан Мехмети
Фотографија: Горан Наумовски
Преземено: Цивил Медиа
