Додека Германија се подготвува да биде домаќин на Конференцијата за безбедност во Минхен подоцна овој месец, неколку меѓународни лидери и германски политички партии ќе бидат исклучени од овогодинешниот собир, истакна претседателот на безбедносниот форум, Кристоф Хојсген. Владите на Русија и Иран не се поканети да им се придружат на околу 50 лидери и околу 100 министри кои треба да присуствуваат на состанокот, кој се одржува од 16 до 18 февруари, објави Дојче веле.
Годишната конференција е независен форум за носителите на одлуки за безбедносна политика кои разговараат за сегашните и идните предизвици. Меѓу учесниците обично се наоѓаат шефови на држави, на влади и меѓународни организации, министри, законодавци и високи воени претставници.
„Пред неколку дена рускиот претседател рече дека со задоволство би преговарал, но не со оваа украинска влада. Со други зборови, нема сериозна волја за разговор. И затоа рековме дека нема да ја поканиме руската влада, но ќе повикаме Руси од невладини организации, политичари во егзил“, изјави Хојсген.
Минатата година тој ја примени истата практика на првата конференција по целосната руска инвазија врз Украина.
„Во случајот со Иран, слушаме од германската влада, но и од Американците, дека нема интерес за разговори. Како што моментално стојат работите, ќе поканиме само Иранци од невладини организации“, нагласи претседателот на конференцијата.
Хојсген додаде и дека некои германски политички партии нема да учествуваат на состанокот, наведувајќи дека нема да биде поканета десничарската партија Алтернатива за Германија (АфД), што се случи и минатата година.
Од партиите претставени во Бундестагот, новата популистичка алијанса Сахра Вагенкнехт (BSW), исто така, не е поканета.
„Пратениците на БСВ во Бундестагот не се избрани како политичари на БСВ, туку како левичари“, изјави Хојсген за ДПА, објаснувајќи ја својата одлука.
Долго време беше вообичаено на конференцијата да бидат поканети политичари од сите партии застапени во Бундестагот. Хојсген ја напушти оваа практика минатата година кога првпат претседаваше со конференцијата и не покани ниту еден политичар на АфД.
„Тогаш реков дека не сакам да поставам црвен тепих за една десничарска екстремистичка партија“, изјави тој за ДПА, нагласувајќи дека некои се сомневаат во овој пристап, но тој верува дека неговата одлука била правилна.
Според него, на безбедносната конференција нема место ниту на десничарската група Вертунион, чиј претседател Ханс-Георг Масен планира да основа партија.
„Ние не покануваме ниту еден од нив, па ќе видиме како ќе биде тоа“, одлучен е Хојсген.
Г. Т.
