Вработените на најстариот државен универзитет „Св. Кирил и Методиј“ во Скопје денеска примија повисоки плати. 3.000 професори, асистенти, административни и технички лица на својата сметка добија плата повисока за 22 отсто, а дополнително зголемување за одреден процент ќе има и од месец март, кога е предвидено и зголемување на минималната плата во државата.
Претседателот на Сојузот на синдикатите на УКИМ , проф. Ангел Ристов вели дека ова е историски успех кој го подобрува стандардот на вработение но воедно и обврска за поголем квалитет во високото образование.
„Да, денес беа исплатени повисоките плати во согласност со Колективниот Договор кој почна да се применува од 1.1.2024 година. Синдикатот е задоволен од постигнатиот историски успех – враќање на угледот и достоинството на УКИМ и подобрување на стандардот на вработените со добивањето на достојни плати. Почитувањето на Колективниот договор од страна на државата е израз и потврда на загарантирана со Уставот Автономија на Универзитетот,“ истакна Ристов.
Според Ристов, соработката на УКИМ со државата треба да продолжи, со цел подобро и поквалитетно образование и понатамошно вложување во истото.
„Ако една држава сака да чекори по стапките на прогресот мора задолжително да води сметка за науката и високото образование на младите. Тие се нашата иднина. Затоа државата треба да ги зголеми буџетските средствата за наука и истражувања ако сака да го унапреди квалитетот во високото образование и науката за доброто на граѓаните“, смета претседателот Ристов.
Примената на договорот се очекува значително да ја подигне мотивацијата за работа и квалитетот на наставно-научниот процес, во интерес на студентите и создавање што поквалитетни генерации кои успешно ќе се интегрираат и ќе раководат со општествените процеси.
Од Министерството за образование и наука велат дека во координација со другите надлежни институции ќе се залагаат за унапредувањето на правата на вработените во високото образование и науката да продолжи и во иднина, а приоритет ќе биде поттикнување на склучување нови колективни договори и со останатите универзитети.
