Секогаш стоиме на своите ставови и нема бегање….Кога некое лице ќе биде осомничено, обвинето, ние ја применуваме мерката на санкционирање, што значи времено остранување на тоа лице, да си докаже невиност, одговори премиерот Зоран Заев на денешната прес конференција на Владата, на новинарското прашање, дали потретседателката на Собрание (осомничена во Рекет), Фросина Ременски, ќе биде отстранета од функциите, и во Собранието и во партијата.
„Вратите се отворени секогаш за секој и за сите. Навремено ќе ги соопштиме нашите ставови, но редно е да видиме за што е тоа лице осомничено, дали е обвинето или слично. Ако се бориме за владеење на правото и еднаков третман на сите пред законот, тогаш тоа треба да го испочитуваме и без разлика тоа дали се однесува на сите нас на одредени партиски или други општествени функции“, нагласи Заев.
Инаку претходно ТВ 24 објави дека Фросина Ременски, Јасна Мандиќ, таткото на Боки 13, Миле Јовановски, асистенткта на Јовановски во „Меѓународниот сојуз“ и самиот Бојан Јовановски се петмината осомничени за перење пари во невладината „Меѓународен сојуз“.
Сите се осомничени за перење пари, помагање и измама. Проширувањето на истрагата за невладината на Бојан Јовановски Боки 13, доаѓа ден пред покренување на обвинение за случајот „Рекет“ во кој осомничена е и поранешната специјална обвинителка Катица Јанева.
Денеска Државниот обвинител Љубомир Јовески откри дека Обвинителството отвори нов случај поврзан со Меѓународниот сојуз на Бојан Јовановски или „Боки 13“, во кој се осомничени се пет лица од кои едно е функционер, а постапка се води и против едно правно лице. Сите се гонат за кривични дела перење пари, измама и помагање.
И.Т.З. и Ј.Ѓ.
